Jerusalem, Risaw:
U Myntri Rangbahduh ka Israel haba ai jingkren sha ki paidbah ka Israel ha ka Lah Sngi U Blei, u la pyntikna ba ka Israel kan leh ia kaei-kaei kaba bha bad ka ban ïada ia ka hok bad ka shongsuk- shongsaiñ jong ki paidbah nong Israel. Ha kajuh ruh ka por u la maham tyngeh ia ki nongialam ka Iran ba kim dei ban ai jingkyrshan ia ki lehnoh Hamas lane ia ki lehnoh Hezbollah lym kumta ka Israel kan hiar thma ia baroh kitei 3 tylli ki ri kiba nud ban iasnoh kti lang bad ban ïakhun pyrshah ia ka Israel. Kane ka khubor ka long ruh hadien ba ka Israel ka la leit thombor bad hiar thma ia ki lehnoh Hezbollah kiba ioh ka jingkyrshan radbah na ka Iran.
Kumta na ka liang u Netanyahu u la pynrem jur ruh ia ka jingleh jong ka Iran ha kine ki sngi, namar ka jing-leit ai jingkyrshan ia kitei ki kynhun lehnoh jong ka Palestine bad Lebanon bad u la kynthoh ruh ia ka sorkar Iran ba ka kwah ban tuklar ia ka thma jong ka Israel pyrshah ia ki nongshun jong ka bad u la maham ruh ba lada ka Iran kan iai bteng ia kane, ka Israel kan ym map bad kan leh ia kaba donkam haba iadei bad ka Iran ruh kumjuh.
Ha katei ka jingkren jong u, u Netanyahu u la kynthoh jur ruh ia ka Iran bad ong ba ka Israel ka iohi shai ia ki jingkyrshan ba buhrieh jong ka Iran ia kitei ki kynhun lehnoh jong ka Palestine bad Lebanon. Kumta, ruh ka Israel ka la dep ban kput bad pynliem ia kitei ki kynhun lehnoh kiba shah synshar ha ka Iran bad lada ka Iran kam sangeh ia kane, ka Israel ka hap ban shim ia kano-kano ruh ka rai ka ban pyntikna ia ka hok bad jingshngaiñ jong ki paidbah nongshong shnong jong ka.
