Shillong, Risaw 01
Haduh saw ngut ki nong India ki la shah kem noh ha ki shipai BSF ka Meghalaya Frontier bad la ïoh ruh ban kurup noh ïa 4 tylli ki kali kiba kit ïa ki marbam mardih na khappud jong ka East Khasi Hills.
Ha ka kyrwoh khubor ba la pyllait da ki BSF, la ong ba ha ka 30 tarik Nailur, 2024 ki shipai ki la ïoh ïa ka jingtip ba thikna ïa ka jingdon ki kali kiba kit shini, kiba ïaid sha Shella lyngba ka surok Iachamati bad mar-mar ki shipai ka 110 Battalion, ki la ïoh bat noh ïa kine 4 tylli ki kali.
La ïathuh ba lai tylli na kine ki kali ki dei kiba kit shini bad kawei ka dei kaba kit ïa u rynsun kiba shongdor haduh T.10 lak. La ïathuh ruh ba ha ka jingtohkit, ki nongñiah jong kine ki kali kim shym la lah satia ban pyni ïa ki kot ki sla ba biang ba ki la ïoh jingbit ban kit ïa ka shini bad u rynsun.
Ïa kine ki briew kiba la ïoh kem ryngkat kitei ki mar ba la ïoh kurup bad ka kali, la aiti noh sha ka tnat Land & Custom kaba don ha Bholaganj.
