Tura, Risaw 01
Hadien ka jingshah kem jong 8 ngut ki nong Bangladesh na South West Garo Hills (SWGH), ki pulit ka West Garo Hills (WGH) ha ka Lah Sngi U Blei ki la ïoh ban kem biang sa 4 ngut ki briew na kane kajuh ka ri na kawei ka kali paidbah katba ki dang leit na sor Tura sha Paikan ha Goalpara, Assam.
Ïa kitei ki 4 ngut la kem na Jengjal, kaba jngai kumba 30 km na Tura.
Hadien ka jingshah pynhiar shuki jong ka Myntri Rangbahduh barim ka Bangladesh, ka Sheikh Hasina, ka la don ka jingpahara kaba jur ha shilynter khappud hapdeng kine ar ri ha kaba ki jingtip ki kdew ruh sha ki jingpyrshang na ka liang ki nong Bangladesh ban wan rung shapoh ka ri.
Katba la jan baroh kawei ka jaka la khang lut lyngba ki jingker ha khappud, kiba bun pat ki jaka kynthup ïa ki wah ki la kylla long pynban ki jaka kiba dang lah ban rung ban mih be-aiñ. Wat hapdeng ka jingpahara kaba jur, ki dang don hi ki briew kiba lah ban sam lyngba kumba ka paw shai na ki jingshah kem ha kine 7 sngi ba la dep.
Ha ka taïew ba la dep, 8 ngut ki nong Bangladesh ki la shah kem hadien ba ki kot ki sla jong ki, ki la paw ba ki long kiba thok. Hadien kane, la rah ïa ki sha ïingshari bad la phah sha along ki pulit na bynta 6 sngi.
Ha ka jingjia hynnin ka sngi, ïa kitei ki 4 ngut la kem katba ki dang don hapoh ka kali paidbah ha ka por ba dang pynlong ïa ka jingtalasi na ka liang ki pulit hakhmat ka thanat Jengjal.
Katkum ka FIR ba la ujor da ka tnad, la bat ïa kitei 4 ngut namar ka jingsuba bad haba la kylli pyrthew, kim shym la lah ban pyni ïa ki kot ki sla ban pynshisha ïa ka jinglong nongshong shnong jong ki.
“Hadien ba la tohkit, ki la phla ba ki dei ki nongshong shnong ka Bangladesh bad ki dang leit sha Assam ha shuwa ban leit sha ki jaka kum sha Kolkata, Chennai bad Guwahati – kumba ka paw na ka bynta ki kam bylla. Hadien ba la talasi ïa ki, la lap ïa ka pisa – India bad Bangladeshi,” la pyntip ka kyrwoh khubor na ki pulit.
Kitei ki nong Bangladesh kiba la shah kem ki dei kiba la tip kyrteng kum u Md Imani Ali (21 snem ka rta), Md Ibrahim Ali (28 snem ka rta), Md Nasirul Islam bad uwei ba 18 snem ka rta.
Shuh shuh kitei ki saw ngut ki la shah kem katkum ka Sec 14 jong ka ‘Foreigner’s Act’.
