New Delhi, Risaw:
Ka kynhun Enforcement Directorate ha ka Lah Sngi U Blei ka la pynngat ha ki kyndon aiñ pyrshah ïa u Myntri Rangbah jong ka Karnataka u Siddaramaiah bad ïa katto-katne ngut kiba la donkti na ka jingkamai ïa ka spah bym hok kaba don jingïadei bad ka Mysuru Urban Development Authority, ha kaba la ïoh jingtip na ka jingdon ka ejahar ha ka Lokayukta jong ka jylla dang shen, la ïathuh ki heh ka kynhun.
Kane ka kynhun tohkit ka la mudui da ka Enforcement Case Information Report (ECIR) ban pynngat ha ki kyndon aiñ ïa u Myntri Rangbah bad ïa kiwei pat kiba la ïadonktilang, ki la ong.
U Siddaramaiah, ka kurim jong u ka B M Parvathi, u para kynsi u Mallikarjuna Swamy bad u Devaraju ha kaba u Swamy u la thied ïa ka jaka bad ai sngewbha sha ka Parvathi bad kiwei pat ki la shah thad kyrteng lang ha ka jingujor ejahar bad shah pynngat hapoh ka Lokayukta kaba ha Mysuru ha ka 27 tarik, Nailur.
Ïa ka jingujor ejahar la pynngat hadien ba ka ïingbishar bakyrpang ha Bengaluru ha ka taïew ba la dep ka la hukum ba la dei ban buh da ka jingtohkit jong ki pulit ka Lokayukta pyrshah ïa u Siddaramaiah.
Ka hukum jong u nongbishar jong ka ïingbishar bakyrpang ka la long shi sngi hadien ba ka HC ka la pynsangeh shwa ïa ka jingthmu ban ailad ïa u Lat ba un pynlong ïa ka jingtohkit pyrshah ïa u nongïalam jong ka seng Congress halor ka jingshah pynshisha ba u la pyndkoh ïa ki jingpyntreikam ha kaba ïadei bad ka jingbhah ïa ki 14 tylli ki jaka sha ka kurim jong u da ka Mysuru Urban Development Authority (MUDA).
