Shillong, Risaw 01
U Myntri Rangbah ka jylla, u Conrad K. Sangma ha ka Sngi Ba ar jong ka taïew ka 1 tarik u Risaw 2024 u la plie paidbah ïa ka MegARISE na ka bynta ka Umïew Catchment Program kaba pynpaw ïa ka dak bad ki sienjam ba la shim ban ïakren halor ka jingïada na ka jingkyrduh um ha ka jylla Meghalaya.
Ïa kane ka jingsdang la ïatreilang bad ka Germany’s KFW Development Bank, da kaba pynleit jingmut halor kumno ban pynthymmai bad pynneh pynsah ïa ka mariang bad ruh ka jingïaineh slem ka jingïoh ïa ka um ha ka nongbah Shillong, da kaba pynbha ïa ka jingdon bad jingïada ïa ka um.
Haba ai jingkren, na ka liang u Conrad u la pyntip ruh ba lyngba ka jingïarap pisa kaba haduh T.344 klur, ka thong jong ka MegARISE ka long ban ïada ïa ki tyllong um jong ka Umïew bad ka Ganol, ka ban pynmyntoi ïa ka nongbah Shillong bad ka Tura ruh ha kajuh ka por.
Shuh shuh ha kane ka sngi na ka liang u Myntri Rangbah u la plie paidbah ruh ïa ka ‘Sustainable Land Management Meghalaya Project’ (SLM). La ong ba kane ka projek ka thmu ban kyntiew ïa ki jingthung bad ka rukom rep kaba ïahap bad ka mariang, kaba angnud ban pynkupbor ïa ki nongrep, kaba kren shaphang ki jingeh bad ban pynlong ïa ka ïew kaba bha bad myntoi bad ruh kaba don jingïadei na ka bynta ki rukom pynmih ïa ki mar rep ba khlem khleh dawai. Kane kan ïarap ruh na ka bynta ka rukom rep tynrai bad ka ban pynkiew bad pynïar ïa ka jingïadei hapdeng kiba rep bad ban pynheh ïa ka ïew.
U Myntri Rangbah u la pyntip ruh ba kine ki projek kin pyni ruh ïa ka jingthrang jong ka Jylla ban pynneh ïa ka rukom ïohnong bad pynneh ïa ka mariang kaba la ïarap kyrshan da ka Meghalaya Basin Management Agency (MBMA) bad ka Meghalaya Basin Development Authority (MBDA).
Ha kane ka sngi la ïadonlang ruh da ka Myntri ka tnat ka rep ka riang ka Sorkar Jylla ka Kong Ampareen Lyngdoh bad u Dr. Florian Wieneke na ka KFW Bank, ki ophisar sorkar lem bad kiwei kiwei.
