Jowai, Risaw 01
Ka Nangbah Dukhu bad ka Lion Sports & Youth Affairs ki la buh jaka ïalade sha ka semi-final ha ka lympung ïalehkai Second Division Football Tournament (7th Debo Shullai Memorial Trophy) ba la pynïaid da ka West Jaiñtia District Sports Association (WJDSA).
Kane ka la wan hadien ba ki la ïoh jingjop ha ki jingïalehkai quarter final kaba la long ha madan Kiang Nangbah Stadium, Jowai ha ka Sngi Ba-ar.
Ha ka jingïakhun kaba nyngkong, ka Nangbah Dukha ka la pynliem noh ïa ka Mukhla Umlangchor da 3-1 kol. Ïa kine la thep da u Shanlang Thubru ha ka minit 6, kumjuh u Rimi oo Susngi (65) bad Nathan Biate (67). Katba ïa ka kol jong ka Mukhla Umlangchor la thep da u Request Shylla ha ka minit 74.
Haba phai sha kawei pat ka jingïakhun kaba ar, ka Lion Sports & Youth Affairs ka la pynliem noh ïa ka Shilliangraij da 3-1 kol. Ïa kine la thep da u Poibiang Pohshna ha ka minit 11, kumjuh u Prosprwell Dhar ha ka minit 47 bad Clinton Suchiang ha ka minit 67. Katba ïa ka kol jong ka Shilliangraij la thep da u Dathrang Ïakai ha ka minit 79.
Kane ka jingïakhun quarter final ha ka sngi Balang kan long hadpeng ka Panliar pyrshah ïa ka Rising Sun Mukhla ha ka por 12 baje mynsngi, katba ka Lumbhahdakha Wahïajer ïa ka Madankynsaw Moo-kyndeng ha ka por 2:30 nohphai sngi.
