Agartala, Risaw:
Ki pulit ka Tripura ki la ïoh kem ïa kumba 2,000 ngut ki briew namar ka jingdonkti ha ki kam beaiñ na ka jingrung beaiñ ha kine ki lai snem ba la leit kum shi bynta ban pynjur ïa ka jingpeitngor pyrshah ïa ka jingwan rung tuh jong ki briew ba nabar. Ka jingleh pyrshah ïa ki nongkhaïi tuh ha ki bynta khappud, ki nongïarap ha ka ban pynrung beaiñ na khappud, ka la nang pynbun shuh shuh ïa ka jingdon jong ki briew kiba shahkem ha kaba ïadei bad ka jingpynrung kyrteng AADHAAR, ong u DGP jong ki pulit ka Tripura u Amitabha Ranjan. Haba ïakren bad ki lad pathai khubor tang hadien katto katne por jong ka jingïalang ba la pynïaid da u Myntri Rangbah ka jylla u Dr Manik Saha ha ka jaka treikam jong ki pulit jong ka Tripura, une u heh pulit u la pynskhem ba ha kine ki phew snem ba la dep ki pulit ki la trei bha ban pynduna ïa ka jingnang bun jong ki kam beaiñ. Ka jingbuh jingkheiñ ka la pyni shai ba ka don ka jinghiar suki suki ha ka jingdon ki kam beaiñ.
“Ha ka jingdon lang u Myntri Rangbah ka Jylla, la pynlong ïa ka jingïalang ban bishar bniah ïa ka aiñ bad ka suk ka saiñ ha ka jaka treikam jong ki pulit. Baroh ki bynta kiba kongsan jong ka kynhun pahara la ïakren sani bha ha ka jingïalang. U Myntri Rangbah ka Jylla u la pynshai ïa ngi halor ki mat kiba bun kiba ïadei bad ka jingwan poi jong u drok bad ka jingpeit bniah ïa ki mar ki mata kiba wan poi da ka lynti kaba beaiñ,” la ong u heh pulit.
Halor ka jingpynpaw ba shen yn sa thaw ïa ka kynhun ban pynkhlaiñ ïa ka jingpahara ha ki jaka khappud, u la ong, “Namar ka jingdon ki kynrum-kynram ha ka saiñ pyrthei ha Bangladesh, la ai jingmut ïa ngi da u Myntri Rangbah ka Jylla ban long kiba husiar bha bad kumta ngi la rai ban thaw ïa ka kynhun kaba kyrpang ban ïakynduh bad ki kynhun tohkit jong ka sorkar kmie bad ki bor pahara ha ki bynta khappud.” Na ka jingshim bad lum ïa ki jingtip na ka jingkren ba la pynkhreh da ka Tripura na ka bynta ka jingïalang, u DGP u la ong, “Lada ngi ïanujor ïa ki snem ba sdang jong kane ka phew snem bad ki ar ne lai snem ba la dep, ka don ka jingnang hiar ha ki kam beaiñ watla ka don ka jingkiew ha ka jingbun briew. Kum ka nuksa, ha u snem 2014 bad 2015 baroh ki beaiñ ba la pyntip ki long 10 hajar tylli kiba mynta ki la hiar sha ka 9 hajar tylli. Mynta u snem ngi la sakhi ba la duna bha na ka jingkiew khlieh ki kam beaiñ.
Ha u snem 2014 ka jingdon ki kam beaiñ baroh haduh u bnai Nailar la ïathuh ba ki don 4,026 tylli ki jingjia jong ki kam beaiñ bad ha u snem 2024, ka jingkheiñ ka long 2,700 tylli haduh u Nailar. Kumba la khmih bniah, la shem ba ka la don ka jingïapher kaba paw wat hapdeng ka jingbun briew bad ki jingeh kiba ngi ïakynduh ha ka kam.” Haba phai sha ka Crime Against Women, ne ki kam beaiñ pyrshah ïa ki kynthei, ha u snem 2014 haduh 2016, ka jingdon ki jingjia ba la ïathuh ka dang neh 2,700 tylli ha kaba kumba la sakhi, ba mynta ki la hiar sha ka 1,500 tylli. Ki kam beaiñ kiba ïadei bad ki mar ki mata ruh ki la hiar na ka 1,200 tylli ki jingjia sha ka 800 tylli ki jingjia ha kine ki shi snem ba la dep, u la bynrap. U heh pulit u la kdew ruh ba ki pulit ki la shim ïa ki lad jingïada pyrshah ïa ki lai lak ngut ki briew ha kine ki shi snem ba la dep. U Myntri Rangbah uba la kren ruh ha kane ka sngi u la ban jur halor ka jingdonkam ban leh da kaba tyngeh pyrshah ïa ki kam beaiñ bad ki kam runar kum ka jingdawa pisa bad ki kam pyrshah ïa ka imlang-sahlang.
