Shillong, Risaw 02
Ki lympung ïalehkai phutbol jong ka Tyrsad Area Sports Association (TASA) ki la nangjam shaphrang ha kaba ka Nongthymmai Neng SC bad ka Mawdngong SC ki la ïoh jingjop ha ka Third bad Second Division ha ka Sngi Balang.
Ha ka jingïalehkai Third Division kaba la long ha madan Tyrsad, ka Nongthymmai Neng ka la pynliem noh ïa ka Wahrisaiñ SC da 3-0 kol. Ïa kine ki kol la thep da u Stambok Kurbah ha ka minit kab 27. Kane ka kynhun ka la ïoh ei sa shi kol na ka daw ka jingbakla thep hi da u rangïalehkai ‘dien ka Wahrisain. Ha ka minit kaba 55 ka Nongthymmai Neng ka la thep biang sa shi kol lyngba u Barohlang Shangpliang na ka bnynta ban khur syndon ïa ka jingjop.
Haba phai sha ka jingïakhun jong ka Second Division hapdeng ka Wahlyngkien Ramkkang SC bad ka Nongmadan SC ki la ïasam mar shi point hadien ba kim shym la lah ban thep kol haduh kaba kut ka jingïalehkai.
Ha kawei pat ka jingïakhun jong kane kajuh ka kyrdan ïalehkai, ka Mawdngong ka la pynliem noh ïa ka Phudbyrnei SC da 3-0 kol. Ïa kine la thep da u Donal Rani ha ka minit kaba 39, Kisar Kharshiing (60) bad u Difulstar Kharshiing (67).
Ka jingïalehkai jong ka First Division ha ka Sngi Palei kan long hapdeng ka Mawlum Tyrsad SCC pyrshah ïa ka Wahlyngkien Sunei SC ha ka por 12:30 mynsngi, katba ka Thaiñthynroh SC ïa ka Pomsanngut SC ha ka por 3 baje janmiet.
