Nongstoiñ, Risaw 02
Ka Mawlarshong SC na ka Nongstoiñ District Sports Association ka la ïoh jingjop ha ka jingïalehkai ‘play-off qualifier’ na ka bynta ka Meghalaya State League ba la pynïaid da ka Meghalaya Football Association ha West Khasi Hills Zone.
Kane ka nam jop jong ka Mawlarshong ka la wan hadien ba ka la lah ban pynliem noh da 3-1 kol ïa ka Sienduli-I SC na ka Mawshynrut Sports Association ha ka Sngi Balang ha madan Mawkadiang, West Khasi Hills.
Kum ban shu pynkynmaw ka kynhun kaba rah ïa ka nam lahduh na West Khasi Hills zone kan ïoh ban leit ïakhun ïa ka MSL 2024 ka ban sdang naduh 26 tarik mynta u bnai. Kumta ban pyntikna ïa kane lane ban ïoh buh jaka sha ka MSL, ka Mawlarshong SC kan hap ban ïakhun biang ha ka 8 tarik mynta u bnai ha ka por 1 baje mynsngi pyrshah ïa ka Lumsohkhlur SC kaba na ka Pyndengumïong DSA.
Na ka liang ka West Khasi Zone Jong ka MFA ka wer ïa baroh ki ‘riew ïeid phutbol jong ka thaiñ ba kin wan sakhi ïa kitei ki jingïalehkai bad ka dor tiket kan long T.50 /- marwei.
