New Delhi, Risaw:
U Myntri Rangbahduh barim ka Israel, u Naftali Benneth, u la ong ba ka jingleit hiar thma jong ka Iran da ki ‘namding pyrshah ïa ka Israel, ka long kaba bakla haduh katta katta bad ruh ka jingbakla kaba shyrkhei tam. Hynrei, u la ong pat ba ka Israel ka don ka lad kaba biang tam ban pynkylla dur ia ka jinglong-jingman hapoh Middle East ha kane ka sien. Kane ka jingkren jong utei u heh barim ka Israel, ka long hadien ba ka Iran ka la ther kumba 108 tylli ki ‘namding sha Israel ha ka miet Sngi Ba-ar bad kumta utei u heh nongialam barim jong ka Israel ruh u la ai jingkyrshan ia ka sorkar jong u Netanyahu ha kane ka por bad ong ba ka Israel ka dei ban pynjot- pynduh lut khoit ia baroh kito ki shlem pynmih bor ding bad ki jaka shna tiar thma ‘nuclear jong ka Iran, khnang ban lait na ki jingma kiba kham heh hadien- habud.
Kumta utei u nong-ialam u la ong ba ka Israel ha kane ka por, ka don ka kabu ban pynkylla dur ia ka jinglong- jingman hapoh Middle East bad kumjuh ruh u la ong ba ka Israel ka dei ban pynduh pynjot shwa nyngkong ia ki jaka buh tiar thma jong ka Iran khnang ba kan nym lah ban leit pynthut ne hiar thma ia ka Israel kumba la leh ki lehnoh Hamaz ha u snem ba la dep.
La ong ba utei u heh shipai Commando barim jong ka Israel na ka kynhun Sayeret Matkal Unit, u la ioh ban long u nongialam jong ka ri Israel naduh u Jylliew jong u snem 2021 haduh u Jylliew jong u snem 2022, kaba la long shi snem kynthih.
U Bennett u la pyniasryryiem dur ia ka Iran bad ka khlieh jong u ‘octopus’, kaba bat ia ka bor jong ki lehoh ha kylleng ka prthei bad la ong ba ka dei ka Iran kaba kynshoit bad aibor ia ki kynhun lehnoh jong ki ri bapher naduh ka Hamas, ka Hezbollah bad kumjuh ruh ka Houthi, kiba la iadon bynta ha kitei ki kam thombom jong ki lehnoh ha Israel.
Hynrei la ong ba kane ka jingleit hiar thma jong ka Iran pyrshah ia ka Israel, ka long hadien ka jingiap jong u nongialam katei ka kynhun lehnoh jong ka Hezbollah, u Hassan Nasrallah bad kumjuh ruh ka jingiap jong u nongialam ka kynhun lehnoh Hamas jong ka Palestine, u Ismail Haniyeh, hapdeng ki jingleit khynra bad jingleit thombor jong ki shipai ka Israel sha Iran bad sha ki bynta khappud jong ka Lebanon bad Israel.
Hynrei la ong ba ki tiar ïada ba khlaiñ bor bad ba kyrpang ba ka Israel ka la pynkhreh ban pyndonkam ha ki por ba kyrkieh, ki la lah ban tehlakam noh ia kitei ki ‘namding ba la ther da ka Iran ym shym lada don kano- kano ka jingjulor ne jingjot sha ka liang jong ka Israel haba iadei bad kane ka jingjia.
