Mawkyrwat, Risaw 02
Kum shi bynta ban rakhe ïa ka Swachhata Hi Seva, ka shlem treikam jong u Executive Engineer PHE Mawkyrwat Division Cum Member Secretary District Swatch Bharat Mission South West Khasi Hills District, Mawkyrwat ha ka 1 tarik ka la pynlong ïa ka jingïakob mareh Marathon kaba 10 Km ïa kaba tip kum ka Swachhata Run 2024.
Ha kane ka jingïakob mareh la wan ban pynshit pynshngaiñ da ka nongmareh ba paw jong ka thaiñ, i Kong Kmoiñ Wahlang ha ryngkat ki nongïashim bynta kumba 200 ngut tam kiba kynthup naduh ki heprit ki samla kynthei bad shynrang, ki rangbah bad ki longkmie.
Ha kane ka sngi na ka liang kane ka shlem treikam u Executive Engineer PHE Mawkyrwat Division lyngba u Bah K. Nongbsaw Executive Engineer ka la ïoh ban noh synñiang da ka song pisa kum ka dak ban kitbok-kitrwiang ïa ka Kong Kmoiñ Wahlang ka ban sa leit mareh sha ri Australia khnang ba kan wanrah ïa ka jingjop ban wanrah nam bad burom ïa ka dong ka thaiñ bad ka ri baroh kawei.
Ïa kane ka jingmareh la kaweh lama da ka Kong Kmoiñ ha ryngkat u Bah K. Nongbsaw ha kaba la sdang na ka ophis PHE, Jakrem, Sakwang, Pynden Sakwang bad pynkut biang ha katei ka shlem treikam.
Ki nongjop jong kiba 15 shaneng shynrang ki long ba nyngkong u Biness Lyngkhoi, ba-ar u Iwell John Ramsiej bad balai u Wonderful Paliar, katba ha ka liang ki kynthei la jop da ka Ibandarisha K .Wanñiang, ba-ar ka Bandasharai Marweiñ bad balai ka Barisha Lyngkhoi.
Ki nongjop jong kiba 15 snem shapoh ha ka liang ki shynrang ki long u Timwilson Ramsiej, ba-ar u Donborlin Mawlong bad balai u Banlumlang K.Jahrin, katba ha ka liang ki kynthei pat la jop da ka Larijanai Wartde, ba-ar ka Rikynti K.Jahrin bad balai ka Mercyfullness Ramsiej.
Haba phai pat sha ki nongjop jong kiba hapoh 10 snem (shynrang) la jop da u Geraldeozio Ramsiej, ba-ar u Joyfulson Wartde bad balai u Kevinstar Kharwar, katba ha ka liang ki kynthei la jop da ka Larikmen K. Wanñiang, ba-ar ka Phibanylla K. Wanñiang bad balai ka Daphilasaphi K. Jahein.
