Shillong, Risaw 02
Ka Mawryngkneng SC ka la long ka lahduh ha ka lympung ïalehkai Third Division Football League 2024 ba la pynïaid da ka Shillong Sports Association (SSA) hadien ba ka la lah ban pynliem noh ïa ka Umpling SC da 3-2 kol ha ka Sngi Balang ha madan First Ground, Polo.
Kane ka nam jop ka la wan urlong lyngba u Kamphylla Dkhar, Banker Mynsong bad u Meban-well Kharsati.
Kane ka jingïakhun ka la long kaba itynnad bad kaba ïakhaid bha ha kaba baroh ar tylli ki kynhun ki la pyrshang ban ïakhun tyngeh naduh kaba sdang. Hadien shiteng kynta ka Mawryngkneng ka la ïoh ban pynkhih jar nyngkong eh lyngba u Kamphylla ha ka minit kaba 32. Kane ka shi kol ka la nang pynïoh mynsiem ïa katei ka kynhun na ka bynta ban ïakhun tyngeh, hynrei ym shym la lah ban thep haduh kaba kut jong ka kylla step.
Dei ha ka kylla miet ba ka Mawryngkneng ka la thep biang ïa ka kol kaba ar lyngba u Banker ha ka minit kaba 46. Hadien katto katne por kane ka kynhun ka la thep biang ïa ka kol kaba lai lyngba u Mebanwell ha ka minit kaba 60.
Wat la ka Umpling ka la shah thep haduh lai kol, hynrei ka jingïakhun tyngeh ki rangïalehkai ka la pynlong ïa kane ka kynhun ban pynphai kylla shi kol lyngba u Mebankitdor Nongkynrih ha ka minit kaba 72. Has hwa ban wai kane ka kynhun ka la thep biang ïa ka kol kaba ar lyngba u Larrykupar Kharnaïor ha ka minit kaba 84 hashwa ba kan mad ïa ka jingshah rem.
Kumta ka Mawryngkneng bad ka Umpling ki la kiew kyrdan sha ka Second Division ha kaba kin ïoh ban ïashim bynta naduh u snem ban wan.
Ka jingïalehkai jong ka Second Division ha ka Sngi Palei kan long hapdeng ka Nongkrem SC pyrshah ïa ka Mylliem Lum SA ha ka por 12:05, katba ka Jongksha SC ïa ka Lumshyiap SC ha ka por 2:45 janmiet.
