Jowai, Risaw 02
Ka shi kol ba la thep da u Pyndap Kharmuti ka la biang pura ïa ka Eastern Warriors ban pynliem noh ïa ka Brother FC da 1-0 kol ha ka lympung ïalehkai 8th Invitation Knockout Football Tournament ba la pynïaid da ka Wahïajer Sports Club ha ka sngi Balang ha madan Wahïajer Sports Complex.
Ka jingïakhun ha kane ka sngi ka la long kaba itynnad bad kaba ïakhaid bha ha kaba baroh ar ki kynhun ki la ïakhun tyngeh naduh kaba sdang. Ka jinglah ban ïalehkai bha ka la pynlong ïa ka Eastern Worriors ban ïoh ïa ka kabu kaba biang lyngba u Pyndap Kharmuti na ka bynta ban thep ïa ka kol kaba nyngkong ha ka minit kaba 28.
Kane ka shi kol ka la ïai neh haduh kaba kut jong ka kylla step hadien ba ka liang pyrshah kam shym la lah ban thep kol. Hadien ba la bteng ïa kane ka jingiakhun jong ka kylla miet kitei ki kynhun ki la pyrshang ban ïakhun tyngeh, hynrei haduh kaba kut ka jingïalehkai kim shym la lah ban pynurlong bad ka Eastern Worriors ka la khur syndon ïa ka jingjop. Ïa ka nam Man of the Match la khur da u rangapkol ka Eastern Worriors u Rio Rymbai.
Kane ka jingïalehkai kan bteng biang biang ha ka 4 tarik ha kaba ka Ladthalaboh SC kan ïakhun pyrshah ïa ka Tyllilang FC ha ka por 2:30 janmiet.
