Shillong, Risaw 02
Ka Meghalaya ka la pynliem noh ïa ka Manipur da 17 run na ka bynta ban bat ïa ka kyrdan ba ha khlkieh duh jong ka Group-A bad ka la ïoh rung sha ka semi final ha ka lympung ïalehkai 1st Senior Women’s Interstate Friendship T20 Tournament 2024 ba la pynïaid da ka North East Cricket Development Council ka ban sdang naduh ka Sngi Palei ha madan kriket Pahamsning kaba ha Ri-Bhoi.
Kumjuh ka Sikkim ka la pynliem ïa ka Mizoram da 9 run ha ka jingïakhun kaba ar ha ka Group-B. Kumta ka Sikkim kaba la lah ban pynliem ïa ka Nagaland hynnin ka sngi bad ban don wan ha ka kyrdan ba ha khlieh duh jong kane ka Group. Ka Nagaland ka don ha ka kyrdan ba-ar ha ka Group-B (ka la pynliem ïa ka Mizoram ha ka sngi sdang) bad ka Manipur ka don ha ka kyrdan ba-ar ha ka Group-A (ka la pynliem ïa ka Arunachal Pradesh hynnin ka sngi).
Ka Meghalaya kaba la jop ïa ka jingkynting pisa, ka la jied ban tied nyngkong bad ka la lah ban kamai 97 run bad shah pynhap 5 wiket ha ki 20 over. Kane ka kynhun ka la shah pynhap 3 wiket na ka bynta 13 run ha shwa ba ka Neha Hajong (18) bad ka Luiza Tamang (32 not out) kin lah ban tied lang 45 run. Hadien ka jingshah pynkhyllem noh ka Neha, ka Daïaka Warjri ka la ïoh 14 run ban pynlong ïa ka Meghalaya ban duna sa tang lai run na ka bynta ban kynjoh sha ka 100 run. Ki nongkawang bol ba kynsai ka Manipur baroh ki la lah ban pynhap wiket, kine ki kynthup ïa ka R.K Linthoingambi Devi (1/13), Chingkheileima Chanu Mangsatabam (1/1) bad ka Monica Devi Ningthoujam (1/13).
Ki la don tang ar ngut ki nongtied ka Manipur kiba la lah ban ïalehai bha kynthup ïa ka Monica (24) bad ka Kalpana Devi Keisham (17 run not out), hynrei kane ka kynhun ka la shah pynhap wiket baroh na ka bynta ban kamai tang 80 run ha ki 18.4 over. Ka Daiaka ka la khur 2/26, katba ka Ruby Chettri (1/5), ka Debasmita Dutta (1/9) bad ka Ajima Sangma (1/13) ki la khur mar shi wiket.
Kumta ka Meghalaya ka la long ka kynhun kaba nyngkong eh ba khur jingjop hadien ba ka la shimti ban tied nyngkong bad la bud sa ka Sikkim.
Hynrei ka Sikkim kaba la shimti ban tied nyngkong hadien ba ka Mizoram ka la jop ïa ka jingkynting pisa, ka la jied ban kawang bol nyngkong. Ka jingduna ban kamai run ka la pynlong ïa ka Sikkim ban kamai 72 run bad shah pynhap 7 wiket ha ki 20 over, ha kaba ka Tshering Ongmu Lepcha (20) bad ka Anjeel Lepcha (18 not out) ki la lah ban ïalehkai bha. Katba ka Mamta Rai ka la khur 3/11 ïa ka Mizoram.
Ka jingïakhun ka la long kaba itynnad na ka bynta ka Mizoram, ha kaba ka Felfeli Pautu ka la tied 14 run bad ka P. Vansangzuali ka la ïoh 22 run, hynrei ka la lah ban kami tang 63/8 ha ki 20 over. Ka Purni Maya Gurung ka la khur 3/8 ha ki 4 over.
Kumta ki jingïakhun semi final kin long ha ka sngi Palei ha kaba ka Meghalaya kan ïakhun pyrshah ïa ka Nagaland naduh ka por 9 baje mynstep, katba ka Sikkim ïa ka Manipur naduh 12:30 mynsngi.
