Shillong, Risaw 02
Ka Mawphlang Upper Primary School ha ryngkat ka jingkyrshan lang da ka Meghalaya Chess Association, ka la pynkut noh ïa ka lympung ïalehkai ‘Inter schools Chess Tournament’ ha ka Sngi Saitjaiñ hapoh jong katei ka skul kaba don ha Mawphlang.
Ha kane ka lympung la wan shim bynta da 209 ngut ki khynnah na ki phra tylli ki skul kiba don hapoh ka Mawphlang Block. Ïa ka nam nongjop ha ka kyrdan Senior jong ki kynthei la rah da ka Emidaka Rymbai na Mawphlang Secondary School, ba-ar ka Faithful Rynjah na ka Maw-phlang Secondary School bad balai da ka Baïasuk Nong-khlaw na ka Mawphlang Secondary School.
Ha ka kyrdan Junior jong ki shynrang la rah da u Firstar Desiar na ka St Paul Secondary School Marbisu, ba-ar u Wilbert Kynsai Sad na ka skul St. Paul bad balai da u Rudolf Rani na ka Mawphlang Secondary School.
Ha ka Under 14 ki kynthei la jop da ka Banyngkong Catherine Kerdalin Thabah na ka St. Paul Secondary Marbisu, ba-ar ka Philapynkmen Khyriem na ka Mawngap District Christian Multi-purpose HSS bad balai ka Twinkle Kharlyngkhoi na ka Mawphlang Secondary School.
Ïa ka nam jop ha ka kyrdan Senior jong ki shynrang la rah da u Gadmiel Lyngdoh Maw-phlang na ka Mawphlang Secondary School, ba-ar u Wanki Babiang Sunn na ka Mawngap Christian Multipurpose HSS bad balai u John Elridge Warjri na ka Sadew Mawkriah Presbyterian Secondary School.
Ha katei ka sngi la sam ruh ïa ki takma sha ki nongïalehkai kiba la wan ha ka kyrdan basaw haduh ban shiphew ha baroh ki kyrdan ïalehkai. Ïa kine ki khusnam la sam da u Director ka tnat pule puthi u Swapnil Tembe (IAS) kum u kongsan ha ryngkat ka jingdon lang u President bad General Secretary ka MCA, ki nonghikai katei ka skul bad kiwei.
