Khliehriat, Risaw 02
Ka 3rd Division Football Tournament kaba pynïaid da ka East Jaiñtia Hills District Football Association (EJHDFA) ka la jam sha ka pre-quarter final hadien ba baroh ki jingïalehkai ki la poi sha kaba kut ha ka Sngi Balang ha madan artificial turf ha Diengshynrum, Khliehriat.
Kine ki kynthup ïa ka Ryntihlang SC Brichyrnot (Pool-A), Ratacherra CSC (Pool-B), Wapungskur SSWO (Pool-C), Umtyra YWSC (Pool-D), Khliehriat East YWSC (Pool-E), Nongthymme SC (Pool-F), Moopyniein SCSO (Pool-G), Tuberkmaishnong CSC (Pool-H), Suchen Mulieh YWSC (Pool-I) Evergreen SC Ladwahwapung (Pool-J), Dkhiah West SC (Pool-K), Wapung shnong SCSC (Pool-L), Moolang SC (Pool-M), Musniang Rim SC (Pool-N), Lumshnong YWSC (Pool-O) bad Lakadong Ummat SCC (Pool-P).
Ha ka jingïalehkai kaba la long ha ka Sngi Balang, ka Umtyra, Tuber Shohshrieh SSC bad Dkhiah West SC ki la ïoh jingjop. Ka Umtyra YWSC ka la pynliem ïa ka Nongsning Youth SSC lyngba ka tie-breaker da 3-1 kol hadien ba ka jingïalehkai ha ka por ba la buh ka la kut khlem don ba thep kol.
Ha ka jingïalehkai kaba bud, ka Tuber Shohshrieh SSC ka la jop da 4-1 kol ïa ka Shymplong SCSC. Ïa ki kol jong ka Tuber la thep da u Kyntulang Shylla ha ka minit kaba 5, ïa ka kol kaba ar la ïarap pynthep da u Precious Sutnga jong ka Shymplong (36), u Bahun Bang (53) bad u Lakhon Bang (74). Katba ïa ka kol jong ka Shymplong la thep da u Elizer Syih ha ka minit 79.
Ha kawei pat ka jingïalehkai ka Dkhiah West SC ka la jop da 1-0 kol ïa ka Wahsanphaw SCSC bad ïa kane la thep da u Neverming Kya ha ka minit 61.
