New Delhi, Risaw:
Ka Iran ha ka miet Sngi Ba-ar ka la ther haduh 181 tylli ki ‘namding sha Israel, ha kaba kane ka la pynsawa ia ki siren jong ka Israel bad ka la pynlong ruh ia ki 10 Million ngut ki paid nongshong shnong ka Israel ban phet sha ki jaka ïada na ki bom ba la pynkhreh da ka Israel.
Hynrei, ka tnat ïada IDF jong ka Israel, ka la pyntip ba kiba bun ki ‘namding la lah ban tehlakam noh da ki tiar ïada jong ka Israel, kiba kynthup ia ka ‘Iron Dome’ bad ka ‘Arrow Systems’.
U Myntri Rangbahduh ka Israel- u Benjamin Netanyahu, u la pynrem jur ia ka Iran halor katei ka jingleit thombor kaba khlem daw ia ka Israel bad ong ba ka Israel ruh kan sa ai da ka jubab kaba biang tam na ka bynta ka Iran namar ka jingpynkheiñ aiñ jong ka Iran da ka jingthmu ban ai jingkyrshan ia ki seng lehnoh kiba ju ioh jingkyrshan na ka kynthup ia ka Hamas bad khamtam eh ka Hezbollah.
Kane ka dei ka sien ba ar mynta u snem ba ka Israel kan shah ther bom ne shah thombor ha ka Iran hadien ka jing-leit thombor ka Iran ia ka Israel ha u Iaiong jong mynta u snem.
Kane ka jingleit thombor jong ka Iran ia ka Israel ha kane ka kynti ka long ban pynhiar kput ia ka jingleit thombor ka Israel sha Lebanon kaba la shim ia ka jingim jong katto-katne ki nongialam ka Hezbollah ha ka taiew ba la dep.
