Shillong, Risaw 03
Ka kynhun nongsiat suloi ka Jylla hapoh ka lama jong ka Shooting Association of Meghalaya (SAM) ki la khur 28 tylli ki takma ha ka XI Northeast Zone Shooting Championship 2024 kaba la kut ha ka 1 tarik mynta u bnai ha Dimapur kaba ha Nagaland.
Kine ki kynthup ïa 6 tylli ki takma ksiar, 12 tylli ki takma rupa bad 10 tylli ki takma rnong.
Ïa ka takma ksiar ha ka 10m Air Rifle (NR) Championship Deaf Women Individual la khur da ka Anjudlca Thyrniang bad ka Daaihunshisha Ïawphniaw ka la khur ïa ka takma rupa, katba ha ka liang ki shynrang u Shashank Shekhar u la khur ïa ka takma rupa. Hynrei u Shashank u la khur ïa ka takma ksiar ha ka 10M Air Rifle (Nr) Championship Youth Men Individual.
U Lucky Pal u la khur ïa ka takma rupa ha ka 10M Air Rifle (Nr) Championship Sub Youth Men Individual bad ïa ka takma rnong la khur da u Mannat Yadav. Ïa ka takma ksiar ha ka 10M Air Rifle (Nr) Championship Master Men Individual la khur da u Rangku Oris N. Sangma.
Ha ka 25M Sports Pistol (Nr) Championship Women Individual, ka Toïaibha Mylliempdah ka la khur ïa ka takma rnong. Ha ka 25M Sports Pistol (Nr) Championship Women (MQS), ka Balari Shisha Rani ka la khur ïa ka takma rupa bad ïa ka takma rnong la khur da ka Shirley Mary Kharbuli. U Pynkhraw Kharshiing u la khur ïa ka takma rnong ha ka 50M Free Pistol (Nr) Championship Men Individual. Ha ka 50M Free Pistol (Nr) Championship Master Men Individual u Anthony Lakiang u la khur ïa ka takma rupa.
Ïa ka takma ksiar ha ka 50M Free Pistol (Nr) Championship Women Individual la khur da ka Balari Shisha Rani, katba ïa ka takma rupa bad rnong la khur da ka Shirley Mary Kharbuli bad ka Toïaibha Mylliempdah. Katba u Pynkhraw Kharshiing u la khur ïa ka takma rnong ha ka 25M Standard Pistol (Nr) Championship Men Individual.
Ha ka 25M Standard Pistol (Nr) Championship MQS, ka Mawdaker Marweiñ ka la khur ïa ka takma rupa, katba ïa ka takma ksiar ha ka 10M Air Pistol (Nr) Championship Deaf Women Individual la khur da ka Manika Pasi. Ka Toïaibha Mylliempdah ka la khur ïa ka takma rupa ha ka 10M Air Pistol (Nr) Championship Women Individual, katba ka Litina Aye ka la khur ïa ka takma rupa ha ka 50M 3P (NR) Championship Women Individual bad ïa ka takma rnong ha ka 50M Open Sight (NR) Championship Women Individual la khur da ka Anjali Singh.
Ha ka 10M Air Rifle (NR) Championship Senior Women Team, ka Jylla ka la khur ïa ka takma rupa lyngba ka Kopal Dubey, Amalisha Sangma bad ka Litina Aye. Kumjuh ha ka 10M Air Rifle (NR) Championship Youth Women Team ka Meghalaya ka la khur ïa ka takma rnong lyngba ka Kopal Dubey, Syesha Oykim Hek bad ka Daaihunshisha Ïawphniaw.
Ka Jylla ka la khur ïa ka takma ksiar ha ka liang ki shynrang ha ka 10M Air Rifle (NR) Championship Senior Men Team lyngba u Shashank Shekhar, Dennyson Kyrsian bad u Mayank Vats. Ka Jylla ka la khur ïa ka takma rupa ha ka liang ki shynrang lyngba u Shashank Shekhar, Abhimanyu bad u Mayank Vats.
Ha ka 10M Air Rifle (NR) Championship Youth Men Team, ka Jylla ka la khur ïa ka takma rupa lyngba u Shashank Shekhar, Lucky Pal bad u Mayank Vats. Ha ka 10M Air Pistol (NR) Championship Senior Men Team, ka Jylla ka la khur ïa ka takma rnong lyngba u Mawdaker Marweiñ, Pynkhraw Kharshiing bad u Walsall Momin.
Na ka liang ka synjuk ïalehkai jong ka SAM ka la pynpaw ka jingai khublei ïa ka tnat ïalehkai jong ka Sorkar Jylla kaba la ai jingkyrshan ïa kane ka kynhun ha kane ka jingleit ïashim bynta sha katei ka lympung.
