Jerusalem, Risaw:
Ki shipai Israel ha ka Sngi Ba-ar, ki la bthah biang ia ki paidbah jong ka thaiñ Shatei jong ka nongbah Beirut ka Lebanon, ba ki dei ban leit phet rieh noh sha kiwei pat ki jaka bad kin mih noh na katei ka thaiñ shuwa ba ka Israel kan leit ban hiar thma sha katei ka bynta ba ka la dep ban maham.
Namar ki shipai ka Israel ki la iathuh lypa ba ka Israel kan sa leit ban hiar thma bad ban pynjulor ia ki jaka buh tiar thma jong ki lehnoh Hezbollah, naka bynta ka jingshngaiñ jong ka Israel bad ban tehlakam ia ki jingma kiba ap ia ka Israel na katei ka kynhun lehnoh jong ka Lebanon.
Kumta ruh la ong ba ka Israel ka dang pynkhreh hi ban leit thombor ia ka Hezbollah wat hapdeng ki jingmaham jong kiba bun ki tnat bad ki ri ka pyrthei ba ka dei ban sangeh noh.
