Shillong, Risaw 03
Kiba bun ki klob ïalehkai phutbol lem bad ki ‘riew ieit phutbol jong ka Jylla ki la pynpaw ka jingbynñiaw halor ka jingleh shiliang khmat ka Sorkar Jylla da kaba ai jaka kyrpang haduh 15 akar sha ka NorthEast United Football Club bad ka la kyntait sharud ïa ki klob kiba don ha ka Jylla.
Kane ka la wan hadien khyndiat sngi ba u CEO ka NorthEast United u Mandar Tamhane u la pynbna ba ka Sorkar Jylla ka la ai sngewbha haduh 15 akar ka jaka ha Mawkhanu na ka bynta ka klob ïalehkai jong ka Indian Super League ban seng ïa ka shlem ai jinghikai phutbol ha kane ka Jylla.
Haba pyrshang ban ïakren bad kiba bun ki nongpynïaid klob na ka nongbah ki la pynpaw ba kane ka jingleh ka Sorkar kan pyntroiñ ïa baroh ki klob kiba don hapoh ka Jylla. “Ha ka jaka ban ai jingkyrshan ïa ki klob kiba don hapoh ka Jylla namar dei ma ki kiba trei shitom na ka bynta ban sei ïa ki nongïalehkai kiba kynsai ba kin nangkiew shaphrang ha ka kam ïalehkai, pynbna ka la leh da khongpong da kaba leh ïeit leh sbun ban ai jingkyrshan ïa ka NEUFC kaba dei ka klob kaba dang shu mih shen dang tang katto-katne snem ha ka Indian Super League.”
“Ngi sngew thamula halor kane ka jingai jaka sngewbha ka Sorkar ïa ka NorthEast United FC. Balei ym ai jaka lang ïa ka Shillong Lajong FC kaba long ka klob kaba don bynta bha ban kyntiew bad pynkiew ïa ka kam ïalehkai phutbol ym tang ha ka Jylla, hynrei ha baroh ka thaiñ shatei lammihngi baroh kawei,” la pynpaw ki ‘riew ieit phutbol ka Jylla.
“Ka Sorkar ka kren ïa ka grassroot football hynrei kane ka kut noh tang ha khapsor. Nga kyrmen ba kiba ieid phutbol bad ki nongïalehkai phutbol kin ïa pyrkhat bad kylli na ka sorkar balei ki hap ban ai jaka sngewbha tang ïa ka NorthEast United FC,” la pynpaw u Bah R.M Kharmyndai uba long uwei na ki ‘riew ieit phutbol.
“Ym ban isih ne ieid ïa kano-kano ka klob, hynrei dei ban kyntiew shuwa ïa ki samla shynrang bad kynthei na Meghalaya da kaba pynïoh jaka lang ïa kiwei ki klob kiba la paw ha ka Jylla khamtam ka Shillong Lajong FC, Rangdajied United FC bad kiwei khnang ba kin lah ban plie ïa ki shlem ai jinghikai ïalehkai phutbol bad skul (football academy-cum-school). Kan long ka jingkyrkhu ïa ki heprit bad ki samla lada lah ban leh kumne namar bun ki samla na ka Jylla ki don sap bha bad lada lah ban leh kumne, kan ïahap ruh bad ka jingong, “kem ïa ki naduh ba ki sdang ban san (Catch ‘Em Young).”
