Ka jingwan buhai shnong jong ki briew ba nabar da kaba ïoh shong ïing wai hapoh ki shnong ki thaw ha ka nongbah Shillong ka la long shisha kaba ishyrkhei khamtam ha ki shnong bad ki dong kiba la shong khleh jaidbynriew haduh bym ithuh-ithaw shuh nangno ki wan bad hato ki long kiba biang ki kot ki sla ne em. Ka jingjur jong ka jingwan buhai shnong jong kine ki briew ba nabar ym tang ba ka la pynkhapngiah ïa ka shnong ka thaw hynrei ka wanrah ruh ïa ki jingsniew kiba bun jait khamtam lei ha kum kane ka por kaba mynta ba la synshar u drok hajan manla ki jaka bad ki shnong.
Dang ha kine ki khyndiat sngi bad taïew la ïohi ba kawei ka briew kaba dei ka bar jylla bad ka snar nongkhaïi drok kaba la tip kyrteng kum ka Aisha Khatoon kaba shong wai ha ka thaiñ Jhalupara ka la shah kem noh ha ki pulit halor ka jingkynnoh donkti ha ka kam khaïi drok. Ym dei tang kane ka briew, hynrei la ïohsngew bunsien ïa ka jingjur jong ki kam khaïi drok bad kiwei ki kam sniew ha katei ka thaiñ ba la wanrah da ki briew kiba shong sah wai. Kum kane ka jingjia, kam dei tang ha katei ka thaiñ hynrei wat sha kiwei ki shnong ki thaw ruh ha kaba na ka jingleh jong katto-katne ngut ki nongshong wai, ka la pynsyllang pat ïa kiwei kiba wad ïing wai hok ban ïoh shong, haduh ba na ka liang ka shnong bad ki trai ïing ki la hap ban phikir bad peit bniah khnang ba kan ym don jingktah hadien habud.
Dang ha ka Sngi Balang, u MLA ka South Shillong konstitwensi u Bah Sanbor Shullai ha ka jingïalang bad ka Shillong Cantonment lem bad ki bor district bad pulit nalor ki trai ïing kaba la long ha Jhalupara Community Hall u la pynbna ban ïakhun tyngeh ïa ka jingkhaïi drok bad ïa ki nongdih drok ha ki jaka kiba hap hapoh ka konstitwensi jong u. Na ka liang une nongmihkhmat u la pynsngew ba katkum ka aiñ, ki trai ïing kiba ai wai ïing ïa ki briew kiba donbynta ban khaïi drok kin ngat lang ha ki kyndon jong ka aiñ Narcotic Drugs and Psychotropic Substances Act, 1985. Kane ka jingpynkynmaw biang ïa kane ka kyndon aiñ, ka long ban pynpei phang biang ïa ki trai ïing ba kin long kiba husiar bad kiba peit bniah haba ki ai wai ïing ïa ki briew khamtam lei ïa kito ki briew kiba wan na kiwei pat ki jylla, ïoh kha-ma-kha kin ngat ei ha ki kyndon jong ka aiñ.
Kumba ka paw ka thaiñ Jhalupara ka long kawei na ki jaka kaba suk bha na ka bynta ki briew ba wan nabar ban wan wad ïing wai. Ym lah ban tip pat ha kano ka dur ki ïoh rung shnong bad kumno ki pynbiang ïa ki kot ki sla bad ka don ka jingong ruh ki don ki briew tang ban ïoh rung khlieh ki shu siew da ka dor kaba heh. Kumta kane ka long ka bynta kaba donkam bha na ka bynta ki bor pynïaid shnong bad khamtam ki trai ïing ba kin da tohkit bniah ha shwa ban ai ïing wai ïano-ïano bad ba dei ruh ban pan ki syrnod pynshisha na ki shnong ba ki wan khamtam lei ïa ki bar jylla kiba shu wan bylla dei ban da kham tohkit jylliew bad ba ki donkam beit ban pynshisha lyngba ka tnat pulit na ka shnong bad Jylla kaba ki wan khnang ban tehlakam ïa ka jingwan ki briew kiba la don dak sniew lypa.
Kumta ki trai ïing ki dei ban husiar bad dei ban tohkit bniah ha shwa ban ai wai ïing naduh kiba khaïi drok bad dih drok haduh ki nongbylla kiba wan na kiwei ki Jylla da kaba pyntikna ba ki nongbylla kiba nabar Jylla kin hap ïoh ka jingpynshisha na ki pulit (police verification) na ka jaka kaba ki wan khnang ban tehlakam ïa ka jingwan laitlan ki runar ban sah ha ki shnong ki thaw lym kumta ki lah ban shu ngat ei kha-ma-kha ha ki kyndon ba eh jong ka aiñ bad wat ban hap shong patok ryngkat ka kuna.
