Imphal, Risaw:
Ki la don kumba lai ngut ki briew, kynthup u shipai jong ka tnat Manipur Rifles, ki la ïap bad 30 ngut kiwei pat ki la mynsaw ha ka Ukhrul distrik jong ka Manipur, ha ka sngi Balang, ha kaba ki nongshong shnong jong ki ar tylli ki shnong Naga, ki la ïakynad bad don bynta ha ka jingïasiat markylliang na ka daw ka jingïakajia pud, la ïathuh ki pulit.
Kumba ka long mynta, ki pulit ki la pynkhlaiñ ïa ki bor pahara ha katei ka jaka, ha ryngkat ka jingpynbna ïa ki hukum ban khang pyntreikam ïa ka Internet Mobile. Uwei u heh pulit ha Imphal u la ïathuh ba ki trai shnong jong ka shnong Hunphun bad Hungpung ki la ïashim bynta ha ka ‘Swachhata Abhiyan’ (ka jingpynkhuid shnong) ha ka sngi rakhe ïa ka Gandhi Jayanti hynrei kynsan kynsan ki la mih ka jingïakynad halor u pud u sam jong ki shnong ba la mih ka jingïakajia.
Ha kane ka jingiakynad, ki don ki samla kiba la sdang ban siat da ki suloi jong ki, ha kaba ar ngut ki trai shnong bad u shipai ki la ïap. Kitei kiba la khlad noh ki dei kiba la tip kyrteng kum u Reileiwung Hongray bad u Silas Zingkhai na ka shnong Hunphun, bad u Worrinmi Thumra uba dei u shipai ka tnat Manipur Rifles na ka shnong Lunghar kaba don marjan bad uba la ïashim bynta ruh ha katei ka jingpynkhuid shnong.
