Shillong, Risaw 03
Namar ka jingdon bad ka jingmih shibun ki kynrum-kynram hapoh ka skulbah North-Eastern Hill University (NEHU) khamtam ha kaba ïadei bad ka jingeh kaba kum ki samla trai ri-trai muluk bad ki nonghikai ki ïakynduh hapoh katei ka skulbah, na ka liang ki nongïalam ka Voice of the People Party (VPP) ha ka 3 tarik u Risaw 2024, ki la leit dalade ban ïakynduh ïa u Vice-Chancellor katei ka skulbah halor kane ka bynta.
U President jong ka Voice of the People Party (VPP) bad uba long ruh u MLA ka Nongkrem Konstitwensi, Bah Ardent Miller Basaïawmoit, u la ong ba ka daw kaba la pynlong ïa ka seng ban leit ïakynduh ïa u Vice-Chancellor ka skulbah North-Eastern Hill University (NEHU), u Prof. Prabha Shankar Shukla ka dei halor ka jingdon ki kynrum-kynram bad ki jingeh kiba ki khynnah pule trai Jylla bad ki nonghikai ki ïakynduh.
Haba ïakren bad ki lad pathai khubor hadien ka jingwan ïakynduh ïa u Vice-Chancellor ka skulbah NEHU, u Bah Ardent u la ong ba lada ka jingdon jong u Prof. Prabha Shankar Shukla kum u Vice-Chancellor hapoh ka skulbah ka wanrah ïa ka jingduhnong, kan bha ba utei u Vice-Chancellor un mih noh shisyndon ban long kum u VC hapoh katei ka skulbah.
U Bah Ardent u la ong ba kum ki nongïalam kim kwah ba kiwei kin wan hapoh ka Jylla tang ban pynmyntoi ïa kiwei pat ki Jaidbynriew bad ha kajuh ka por na ka liang ka VPP ka la aipor ruh ïa utei u VC ka skulbah ba un pynbeit ïa ki jingeh bad jingduna khamtam kiba long pyrshah ïa ki trai ri-trai muluk lane kaba long ‘Anti-Local’.
“Ngi shu wan ban ïakynduh ïa une u VC ban ong ba lada ka jingdon jong u ha kane ka skulbah ka long ka jingduhnong ïa ngi, ka bha ba un mih noh na kane ka jaka jong ngi namar ngin nym shah ïano-ïano ban wan hangne ban pynmyntoi ïa kiwei pat ki bym dei hok ban ïoh ïa ki jingmyntoi bad ban pynduhnong ïa ka Jaitbynriew jong ngi”, ong u Bah Ardent.
Shuh-shuh u Bah Ardent u la ong ba na ka liang ka seng kan ap ïa ka jubab jong u VC namar ka jingleh jong u VC ka la long kaba leh donbor khamtam haba u shim ïa kino-kino ki rai ban thungkam ïa ki briew hapoh ka skulbah khlem da burom lem ïa kiwei kiba don bynta lem.
“Ki lah bun ki jingeh kiba une u VC u la pynmih bad ka shong ha u mynta ba un pynbeit kumno ïa kita ki jingeh. U dei ban pynbeit ïa kine ki jingleh donbor bad jingleh bakla jong u bad un hap pyntip ïa ngi ha ki khyndiat sngi, lada kam long kumta, ngin nym shong kli-kti hynrei un hap ban mih napoh ka Jylla namar kam don jingmyntoi ba un don hangne”, la bynrap u Bah Ardent.
