Washington, Risaw:
Katkum ki khubor, la ong ba ki nongai jingmut ba hajan eh jong ka Vice President ka US- ka Kamala Harris, ki la leit ban ïakynduh ïa ki nongïalam Muslim bad Arab jong ka America ha ka Sngi Balang, da ka jingthmu ban khring vote ia ki nongkyrshan na ka bynta ka ilekshon President jong ka Harris. La ong ba kitei ki nongbud jong kane ka nongialam ki la leit ban pan jingkyrshan na kitei ki jaitbynriew kiba pyrshah ia ka jingleh jong ka sorkar US ha kane ka por, namar ka jingleit ai jingkyrshan jong ka US ia ka Israel haba iadei bad ki jingleit hiar thma jong ka Israel sha Gaza bad Lebanon.
Kumta la ong ba u National Security jong ka Harris, u Phil Gordan, u la iathuh ha ki nongialam paidbah ha katei ka jingialang kaba u la leit ban kynduh ia kitei ki jaitbynriew kiba nabar ka ri US, ba ki bor synshar ka US ha ka jingshisha ki la kyntu ia ka Israel ban sangeh noh wat ia ka thma hapoh Gaza, bad kim shym poi pyrkhat bad ka Israel kan leit thombor pynban sa sha Lebanon bad kane ka long ka jingma kaba khraw ia ka Middle East bad ia ka pyrthei hi baroh kawei lada ym lah ban pynsangeh ia katei ka jingleit thombor jong ka Israel na kawei ka ri sha kawei pat.
Kumjuh ruh uwei pat, u Ali Dagher, uba long u nongïasaid aiñ bad uba long trai shnong na Lebanon bad America, u la ong ba ka jingpyrshang jong ka Harris ban leit tur sha ki paidbah ka dang tlot palat bad kan nym lah ban poi sha ka thong lane ban ioh ia ka jingjop lada ka long ha kane ka rukom.
Ka Harris, kaba long ka nongïakhun pyrshah jong u President barim ka US, uba long ruh u nongialam jong ka seng Republican – u Donald Trump, ha ka ilekshon President kaba la pynbeit ban long ha ka 5 tarik u Naiwieng jong une hi u snem.
Namar la ong ba u Persident ka US ba mynta- u Joe Biden, u la ioh khur ia ka jingjop da ka jingkyrshan ba ratbah jong ki jaitbynriew Muslim bad ki nong Arab ha u snem 2020, hynrei ka jingkyrshan jong kitei ki jaitbynriew ia ka sorkar u Biden, la iohi ba ka la hiar bha ha kine ki sngi bad naduh ba ka Israel hi ka la leit ban hiar thma ban kput ia ki lehnoh Hamas kiba synshar hi ia ka nongbah Gaza mynta da ki phew snem.
Kumta, la ong ba kitei ki paidbah nong Muslim bad Arab, ki la pharep ba u Biden bad ka Harris kim shym la trei shitom eiei ban pynsangeh ia ka thma jong ka Israel pyrshah ia ki lehnoh Hamas hapoh Gaza bad kane ka la ktah jur ia ki paidbah nongshong shnong ka Gaza Strip. Namarkata, bun na kitei ki nongialam jong kitei ki jaitbynriew, ki la kyntu ia ki paidbah jongki ba kim dei shuh ban dang shaniah ha ka sorkar US lane ha kine ki nongialam jong kane ka sorkar ba mynta namar ba kim lah ban leh eiei naka bynta ka bha- ka miat bad ka jingbha jong kiwei pat ki jaitbynriew ha kiwei pat ki ri.
Namar la ong ba ki don palat 1,900 ngut ki nong Lebanon kiba ka duh ei ia ka jingim bad kumba 9000 eiei kiba la mynsaw ha ka jingiakynad kaba la neh slam hapdeng ka Israel bad ki lehnoh Hezbollah jong ka Lebanon namar ka jingai jingkyrshan jong kitei ki lehnoh ia ka kynhun lehnoh Hamas jong ka Palestine ha Gaza Strip. Bad kiba la dawa ruh ba ka Israel ka dei ban sangeh noh ia ka thma shi syndon bad lada kam lah ban leh ia kane, kin pyni da ka bor bad ka Israel kan hap ban mad jingeh ym tang bad ki Hamas hynrei bad katei ka kynhun Hezbollah ruh ha kajuh ka por.
