Shillong, Risaw 03
Ka jinghap slap baroh shi sngi ha ka Sngi Palei ka la pynlong ïa ki jingïalehkai semi-final jong ka 1st Senior Women’s Interstate Friendship T20 Tournament ban pynkynriah noh sha ka Sngi Thohdieng.
Ïa kane ka lympung la pynïaid da ka North East Cricket Development Council (NECDC) ha ryngkat ka Meghalaya Cricket Association (MCA) ha madan Pahamsning Cricket Ground kaba ha Ri-Bhoi.
Ha ka jingshisha ha kane ka sngi la lah ban pynlong tang katto-katne ‘over’ hapdeng ka Meghalaya bad ka Nagaland, hynrei ym shym la lah satia ban pyndep ïa kane ka jingïakhun lane ban sdang ïa ka jingïakhun ba ar hapdeng ka Sikkim bad ka Manipur.
Kumta ka Tournament Committee ka la shim ïa ka rai ba ïa ka semi final yn pynlong mynta ka Sngi Thohdieng ha kaba ka Meghalaya kan ïakhun pyrshah ïa ka Nagaland ha ka por 9 baje mynstep bad ka Sikkim pyrshah ïa ka Manipur ha ka por 12:30 baje mynsngi.
Lada jia ba ym lah ban pynlong ïa ka jingïalehkai ha kane ka sngi (Sngi Thohdieng), yn pyntreikam noh ïa ka Rule No. 14 jong ka jingïalehkai ban rai ïa ka jingjop ha kaba kan dei ka sien kaba nyngkong ban pyndonkam noh da ka super over. Lada ym lah pat ban pynlong ïa ka super over, yn pyndonkam da ka “bowl out” bad lada kane ruh kam lah ïa ka jingmih yn rai da kaba kynting pisa.
Ka komiti ka la rai ban pynlong ïa ka jingïakhun final ha ka Sngi Saitjaiñ bad yn ym pynkynriah shuh hadien.
