Jowai, Risaw 03
Ka Panaliar bad Lumbhahdakha Wahïajer ki la jam sha ka semi final jong ka lympung ïalehkai Second Division Football Tournament (7th Debo Shullai Memorial Trophy) ba la pynïaid da ka West Jaiñtia District Sports Association (WJDSA) hadien ba ki la ïoh jingjop ha ka Sngi Palei ha Kiang Nangbah Stadium, Jowai.
Ha ka jingïakhun quarter final kaba nyngkong, ka Panaliar ka la pynliem noh ïa ka Rising Sun Mukhla da 2-1 kol. Ïa ki kol jong ka Panaliar la thep da u Samhame Sumer ha ka minit kaba 39 bad u Pynskhem Shylla ha ka minit kaba 59, katba na ka Rising Sun Mukhla la thep da u Stopper Bang ha ka minit kaba 69.
Ha ka jingïakhun kaba bud, ka Lumbhahdakha Wahïajer ka la pynliem ïa ka Madankynsaw Mawkyndeng da 3-0 kol. U Gideon Mukhim u la thep ar kol ha ka minit 62 & 66, katba ïa kawei pat la thep da u Rimiki Dhar ha ka minit kaba 58.
Na ka liang ki bor pynïaid ki la pynbna ba ïa ka jingïakhun semi final yn pynlong ha ka 7 bad 8 tarik mynta u bnai ha ka por 2 baje nohphai sngi hapdeng ka Nangbah Dakhu pyrshah ïa ka Panaliar, katba ka Lion Sports & Youth Affair ïa ka Lumbhahdaka Wahïajer.
