Shillong, Risaw 03
Ka Jongksha SC ka la pynliem noh ïa ka Lumshyiap SC da 7-3 kol na ka bynta ban ïoh jingjop ha ka lympung ïalehkai Second Division Football League 2024 ba la pynïaid da ka Shillong Sports Association (SSA) ha ka Sngi Palei ha SSA Stadium, Polo.
Kane ka nam jop ka la wan urlong lyngba u Basuklang Bina bad u Donboklang Lyngdoh na ka bynta ban pynlong ïa kane ka kynhun ban ïoh lai point.
Ha kane ka jingïakhun u Basuklang u la thep ha ka minit kaba 25 & 54 bad u Donboklang Lyngdoh ha ka minit ba 45+1 & 83, katba ïa kiwei pat la thep da u Robert Khongjoh (33), Pynïaidlang Songthiang (35) bad u Liberius Mynsong (43).
Na ka liang ka Lumshyiap ka la lah ban pynphai kylla lyngba u Arky Kharmalki ha ka minit kaba 46, u Firstborn Ïawphniaw (73) bad u Banbishar Mawlong (90+2) hashwa ba kan mad ïa ka jingshah rem.
Haba phai sha kawei pat ka jingïakhun kaba la long kham ha shwa, ka Nongkrem SC ka la pynliem noh ïa ka Mylliem Lum SA da 2-1 kol. Ïa kine la thep da u Sawadame A. Tang ha ka minit kaba 45 bad u Wilbert Marbaniang (84), hynrei hashwa ban wai ka Mylliem Lum ka la lah ban pynphai kylla shi kol lyngba u Eliastar Nongsiej ha ka minit kaba 90+5 hashwa ba kan mad ïa ka jingshah rem.
Kane ka lympung kan bteng biang ha ka Sngi Thohdieng ha kaba ka Meghalaya Police F.T kan pynkhreh ban ïakhun pyrshah ïa ka Smit SC ha ka por 02:45 nohphai sngi.
