Shillong, Risaw 04
Ka Shillong Sports Association (SSA) ka la pynbna ba kan sdang noh ïa ka lympung ïalehkai OC Blue Shillong Premier League 2024 ha ka 16 tarik mynta u bnai ha kaba kin don haduh 90 tylli ki jingïalehkai mynta ka aïom.
Ki kynhun ki ban ïashim bynta ha kane ka lympung ki long 10 tylli kiba kynthup ïa ka lahduh jong ka aïom ba la dep ka Mawlai SC, kumjuh ka Rangdajied United FC kaba la wan ba-ar ha u snem 2023 bad shah rem ha ka semi-final 2023, ka Shillong Lajong FC bad ka Langsning FC, ka Ryntih FC, Sawmer SC, Nongthymmai SC, Nangkiew Irat SC lem bad ar tylli ki kynhun kiba la kiew kyrdan na ka First Division, kita ka Nongrim Hills SC bad Laitkor SC.
Ka OC Blue ka la wanphai biang kum ka nongkyrshan ïa kane ka lympung mynta ka samoi. Na ka liang u President ka SSA u Banteidor Lyngdoh u la pynbna ha ka jingïalang pyllait paidbah ha ka Sngi Thohdieng ba ka khusnam pisa kan long ar shah ha kane ka samoi ka ban kot shaduh ka T.6 lak tyngka na ka bynta ka lahduh ha kane ka lympung. Katba, kaba wan ba-ar kan ïoh T.3 lak bad baroh ki klob kin bteng ban ïoh ïa ka bhah na ka khajna tiket.
Ka SSA ka thmu ruh ban pynlong ïa katto-katne ki jingïalehkai hapoh ki floodlight ha SSA Stadium kaba ha First Ground, khnang ban pynbha ïa ka jingïalehkai lyngba ka jingtuid ki nongkyrshan.
Ha kane ka sngi la pyllait ïa ka trophy jong ka SPL ba la sakhi lang da baroh ki kapten na 10 tylli ki klob.
“Ka OC Blue ka dap da ka jingkmen ban ïatreilang bad ka Shillong Premier League ban kyntiew ïa ka jingïalehkai phutbol ha ka Jylla. Ngi kyrmen ba kane ka jingïatreilang kaba slem kan ïarap ïa ngi ban lap ïa u khlur ïalehkai ki ban paw ha ka phutbol jong ka ri lyngba kane ka nongbah,” la ong u Vineet Grover, Sales Director East na ka bynta ki Allied Blenders bad Distillers, ki nongshna ïa ka OC Blue.
