Shillong, Risaw 04
Ka long kaei-kaei ka jingkmen kaba khraw bha ba kawei na ki skulbah jong ka Jylla ïa kaba la tip kum ka University of Science and Technology Meghalaya (USTM) kaba dei ka skulbah A grade kaba la pynskhem da ka NAAC, ka la pynbna da ka jingsngew sarong ïa u mawjam ba kongsan ha ka jingleit jingwan jong ka ha ka pule puthi ha ryngkat ka jingkyrshan na ka tnad ka koit ka khiah, ka Sorkar India bad ka National Medical Commission (NMC) kaba la mynjur ïa ka PA Sangma International Medical College and Hospital (PIMC), da ka jingtrei -lang jong ka USTM bad ka Sorkar Meghalaya.
Haba kren sha ki lad pathai khubor ha ka Sngi Thohdieng ka 4 tarik u Risaw 2024 ha Shillong Press Club, u Founder Chancellor ka USTM, u Mahbubul Hoque, u la ong ba kane ka dei ka jingjop kaba pawnam na ka bynta ka USTM bad ka sienjam kaba kongsan ha ka jingïaid lynti jong ka skulbah ban noh synñiang kaba don jingmut sha ka tnad ka koit ka khiah jong ka thaiñ bad ka jaitbynriew.
U Hoque u la ong ba nangne shakhmat ki nongpang bad ki samla pule kim donkam shuh ban leit shabar jong ka jylla na ka bynta ki jingshakri ha ka koit ka khiah.
U Hoque u la ong ruh ba kane ka skulbah kan shim 150 ngut ki samla pule na ka bynta ka prokram MBBS ba nyngkong jong ka, kaba pyni ïa ka lynnong kaba thymmai ha ka jingkular jong ka USTM ban ai ïa ka jinghikai kaba ha khlieh duh ha ka liang ka jingsumar.
Ka PIMC ka la buh ïa ki mawjam ha ki lai tylli ki bynta: kata ka jinghikai ba bha ha ka liang ka koit ka khiah, ka jaka sumar kaba pawnam, bad ka jaka wad bniah kaba thymmai.
U la ong ba ïa kane ka samoi pule ne ka ‘Academic Session’ yn sdang naduh ka taïew ba khatduh jong u bnai Risaw 2024 da kaba khot aplikeshon na bynta ki doktor kiba kwah ban long doktor na ka jylla Meghalaya bad na kylleng ka ri.
U Hoque u la pyntip ba ha kane ka jaka pule la mang 40 tylli ki seat na ka bynta ka sorkar jylla ha kaba na kine, 25 tylli ki seat ïa ka bai pule yn lut da ka sorkar jylla bad 15 tylli ki seat ïa ka bai pule yn lut shiteng da ka skulbah.
“Katkum kane, na ka bynta kiwei pat ki jingpule para -medical, ka rukom ai bhah kaba kum kane kan treikam na ka bynta ki samla pule jong ka jylla Meghalaya”, ong u Hoque.
Na ka liang u Founder Chancellor jong ka USTM, u la ai khublei ruh ïa ka Sorkar Meghalaya kaba la tyrwa ïa baroh ki jait jingkyrshan ban bud ryntih ïa ki kyndon jong ka NMC ha ka por ba la buh.
“Ka Super Specialty hospital kaba don ka jaka ban pynkylla ïa ki dkhot met kan treikam pura hapoh ki 6 bnai ban wan. Ki doktor kiba tbit bha na kiwei pat ki bynta jong ka ri kin ïasoh bad ka PIMC”, u la bynrap.
Shuh-shuh u Hoque u la ong ba ka jingjer kyrteng ïa kane ka jaka pule doktor ka dei kum ka jingburom ïa u PA Sangma ba la khlad noh, u nongïalam u ba don ka jingïohi jngai bad u Lamphang barim ka Lok Sabha, bad kane ka jaka pule doktor ka buh ïa ka jingthmu ban long kawei na ki jaka pule kaba pawnam bha na ka bynta ka jinghikai ha ka liang ka koit ka khiah ha ka thaiñ shatei lammihngi jong ka Ri India.
“Ka kolej kan ai ïa ka jinghikai kaba bniah kaba la shna khnang ban kyntiew ïa ka jingroi jong ki ‘riew shemphang ha ka liang ka koit ka khiah kiba la pynkhreh ban pynbiang ïa ki jingdonkam ha ka koit ka khiah jong ka imlang sahlang da ki lad hikai-pule kiba kham tbit bad kaba pynleit jingmut ha ka jingwad bniah bad jingpynwandur thymmai, ka thmu ban khring ïa ki samla pule kiba don sap na kylleng ka ri bad shabar”, ong u Hoque.
Da ka kynhun ba nyngkong jong 150 ngut ki samla pule, ka PIMC ka la pynkhreh ban buh ïa ki kyndon kiba thymmai ha ka jingpule ha ka liang ka koit ka khiah bad ki jingshakri ha ka koit ka khiah.
Ha kaba ïadei bad ki jaka sumar, yn tyrwa 50% ki jaka sumar na ka bynta ka super-speciality sha ki nongpang na ka jylla Meghalaya ryngkat bad ki jaka sumar kyllum khlem jingsiew. Kawei na ki jingthmu ba kongsan ka long ban khring ïa ki Ri ASEAN ban ïoh ïa ki lad jingsumar jong ka PIMC ha ka por ban wan.
Da kaba ithuh ïa ka jingnoh synñiang jong u Dr Donkupar Roy, Myntri Rangbah barim ka Jylla Meghalaya uba la khlad noh, ki bor pynïaid ki la rai ban pynkyntang ïa kane ka Dental College ka ban sa wan kum ka jingburom ïa u Dr Donkupar Roy.
