Shillong, Risaw 04
Ki lai tylli ki jylli jong ka Khasi Students’ Union (KSU), kita ka Sawsymper Circle, Lawbah Border Area Circle bad ka Balat Border Area Circle ki la wan pynlong da ka jingïakhih ba jai-jai ha madan Malki ha ka Sngi Thohdieng ban dawa na ka sorkar jylla ban ai noh ïa ka Mawsynram Civil Sub-Division.
Kane ka jingïakhih ba jai-jai ka la sdang naduh ka por 10 baje mynstep bad kut haduh 4:00 baje janmiet ha kaba ki dkhot ka KSU kiba don palat spah ngut ki la wan ryngkat ki jingthoh ban dawa Civil Sub Division ïa ka Mawsynram Block.
Haba ïakren bad u samla Sambor Shabong, President KSU Lawbah Border Area Circle u la ïathuh ba kin ym ïaid paidbah hynrei kin ap ïa ka jubab na madan Malki, bad lada kim ïoh jubab kin sa pynkhreh ki prokram ba kham jur nangne shakhmat.
U la ïathuh ba kane ka jingïakhih shaduh Shillong ka dei hadien ba ka sorkar kam sngap ïa ka jingdawa ka seng haba ki pynlong ka jingïakhih ba jai jai ha Mawsynram.
U President ka KSU South West Khasi Hills District u samla Forwardman Nongrem u la ong ba lada ka sorkar ka dang sngap jar jar, kin wer da ki hajar ngut ki paidbah ka Mawsynram Konstitwensi ban tur bad pynkhih ïa ki païa jong ka Secretariat haduh ban da ïoh ïa ka jingdawa.
Ha kane ka sngi la wan ban ai jingkyrshan da u MDC ka Mawsynram Konstitwensi Bah Alvin Sawkmie bad u MLA barim ka Mawsynram Bah HM Shangpliang uba dei u nongaibuit ka sorkar jylla ha ka tnat pule puthi.
Nangta la wan ai jingkyrshan u Syiem ka Hima Bhowal u Pa’iem Kynsai N Syiem bad kiwei ‘riew rangbah.
U Bah Alvin u la ong ba ka sorkar kam dei shuh ban dang eksamin hynrei dei ban ai noh ïa ka Civil Sub Division kaba la slem bha.
Katba u Bah HM Shangpliang u la ong ba kum u nongaibuit jong ka sorkar jylla un sa ïakren ïa ka sorkar bad ïa u Myntri Rangbah ka jylla u Conrad Sangma ban pynskhem ïa kane ka jingdawa bad ka burom kan leit sha kiba dei hok kiba la pynlong ïa kane ka jingïakhih.
