Shillong, Risaw 04
U Deputy Chief Executive Member ka Khasi Hills Autonomous District Council, Bah Pynshngaiñ N Syiem u la ong ba ki don ki nongïalam seng saiñ pyrthei (Politician) kiba ong ba donkam tang ïa ka Sorkar Jylla, ki Bor District, ki Block Officer bad ki shnong, da kaba pynjah noh ïa ka District Council, ki Hima bad ki Raid.
Ïa kane u Bah Pynshngaiñ u la kren ha ka jingïalang ban pynkhlaiñ ïa baroh ki Hima hapoh ka Synjuk ki Hima Khasi (Federation of Khasi State), kaba la long ha ka 4 tarik Risaw ha Khasi National Dorbar Hall, Mawkhar.
Haba kylli halor kane ka jingkren, u Bah Pynshngaiñ, khlem da jer kyrteng u la ong ba u ïohsngew ba don ki nongïalam seng saiñ pyrthei, kiba pynpaw ba ka rukom treikam da ka Sorkar Jylla, District Council, Hima, Raid, Shnong kim kwah ban don, hynrei ki kwah beit ban don tang ka Sorkar, ka ophis Deputy Com-missioner, ka ophis BDO bad ki shnong.
Shuh shuh une u MDC ka Congress u la ong, kane kam lah ban long namar kaei kaba la saiñdur baroh shi katta ka dei ban neh ka dei ban skhem da ka jingïatreilang ka Sorkar bad ki district council kumjuh ki hima ki raid ki shnong bad donkam ban pynskhem shuh shuh ïa kane kaba la don.
