Khliehriat, Risaw 04
Ka Wapungskur SSWO, Ratacherra CSC bad Moopyniein SCSO ki la rung sha ka quarter final jong ka lympung ïalehkai Third Division Football Tournament ba la pynïaid da ka East Jaiñtia Hills District Football Association (EJHDFA).
Kane kala wan hadien ba kine ki kynhun ki la khur jingjop ha ka jingialehkai pre-quarter final kaba la long ha ka sngi Thohdieng ha madan Artificial Turf Deinshynrum, Khliehriat.
U Gradely Mylliem ula khur da ka hat-trick bad pynlong ïa ka Ratacherra CSC ba kan pynliem ïa ka Umtyra YWSC da 7-0 kol.
Ha kane ka jingïakhun u Gradely ula thep ha ka minit 12, 30 & 67 bad bynrap sa ka kol u Lutmon Pohshna ha ka minit 19, Heibormi Pohshna ha ka minit 33, Misaial Bareh ha ka minit 75 bad u Brightstar Pyngrope ha ka minit 80.
Hashwa kane, ka Wapungskur SSWO ka la pynliem ïa ka Ryntihlang SC Brichyrnot da 3-1. Ha kana ka jingïakhun ka Brichyrnot ka la thep kol nyngkong ha ka minit kaba 5 lyngba u Wanki Muksor, katba Wapungskur SSWO ka la lah ban pynphai kylla haduh lai kol lyngba u Wallam Siangshai ha ka minit 14, Langki Suchiang ha ka minit 55 bad Pynshlurmi Siangshai ha ka minit 74.
Ha ka jingiakhun kaba bud ka Moopynieiñ SCSO ka la jop ïa ka Khliehriat East YWSC da 1-0 kol bad ïa kane ka shi kol la ïarap pynthep da u rangïalehkai ka Khliehriat East u Felix Rymbai ha ka minit kaba 80+3.
Ka jingïalehkai pre-quarter final ha ka sngi Saitjaiñ kan long hapdeng ka Nongthymme SC pyrshah ïa ka Tuberkmaishnong CSC ha ka por 12:30 baje mynsngi, katba ka Wapungshnong SCSC ïa ka Evergreen SC Ladwahwa-pung ha ka por 2:30 baje nohphai sngi.
