Shillong, Risaw 04
Ka Mawlum Tyrsad SCC bad ka Thainthynroh SC ki la ïoh jingjop ha ka lympung ïalehkai First Division Football Tournament 2024 ba la pynïaid da ka Tyrsad Area Sports Association ha ka Sngi Palei.
Ha kane ka jingïakhun kaba la long ha madan phutbol kaba ha Tyrsad, ka Mawlum Tyrsad ka la lah ban pynliem noh ïa ka Wahlyngkien Sunei SC da 2-0 kol.
Kane ka nam jop ka la wan urlong lyngba ki kol ba la thep da u Badondor Khongsit ha ka minit kaba 52 bad ïa kawei pat la thep da u Banshem Khongsit ha ka minit kaba 77.
Haba phai sha kawei pat ka jingïakhun kaba ar, ka Thaiñthynroh SC ka la jop da 3-0 kol ïa ka Pomsanngut SC.
Tang mar ïasdang ka jingïalehkai ka Thaiñthynroh ka la ïoh ban pynkhih jar nyngkong eh ha ka minit kaba 8 lyngba u Opingstar Kharryngki. Hadien saw minit kane ka kynhun ka la thep biang ïa ka kol kaba ar lyngba u Judgewell Wartah bad ïa ka kol kaba khatduh la thep da u Bhaboklang Kharryngki ha ka minit kaba 57 ban khur syndon ïa ka jingjop.
