Shillong, Risaw 04
Ki hynriew tylli ki shnong kiba hap ha ka Maharam Syiemship ha ka 4 tarik u Risaw 2024 ki la leit ban ïakynduh ïa u CEM ka KHADC u Bah Pynïaid Sing Syiem ha kaba ïadei ban kyrpad phah biang ïa kine ki shnong sha Langrin Konstitwensi ha kane ka MDC ilekshon ka ban sa long shen.
Haba ïakren bad ki ‘riew rangbah kiba wan ban ïakynduh ïa u CEM, ki la ong ba ki nongshong shnong ka Mawpait Trongpleng, Raibah, Nongthymmai Raid Dewsaw, Mawlangroh, Domshken Rum, Dom-shken bad Mawshaliah ki la kyrpad ban weng noh na Mawsynram bad na ka liang ka District Council ka la dep ban pdiang.
Ki la ong ba kaba lyngngoh pat ka long ha ka dorbar kaba la dep na ka liang ka Council ka khlem pyntreikam ïa kane ka ‘bill’ katba ka EC ka tyrwa kylla sha ka Select Committee bad kane ka pyni ba ka Select Committee ka leh donbor namar u khliehduh jong kane ka komiti u dei u Deputy CEM Bah Pynshngaiñ N Syiem bad na ka daw ka jingïatyngkhuh hima u Bah PN Syiem u la leh donbor noh.
Na kata ka daw, ha kaba ïadei bad kane ka mat na ka liang ki nongïalam jong ki shnong ki la leit ban ïakynduh ïa u CEM bad na ka liang jong u, u la kular ban shimkhia lyngba ka jingïalang ka ban sa pynlong bad ki Executive Member ha kaba yn sa ïakren ha ka taïew ban wan.
Na ka liang u Bah Pynïaid u la pyntip ba ha u bnai Nohprah kan don ka Amendment na ka bynta ka 6th Schedule ha kaba kan don ka jingpynrung ne pynmih thymmai ïa ki konstitwensi jong ki MDC; kaba mut na ka 29 sha ka 35 tylli ki konstitwensi bad kan don ka jingkyrmen ba kiei-kiei kin wan biang kumba ju long bad ban ym shah pynneh hapoh ka Mawsynram Konstitwensi.
