Tura, Risaw 04
U MLA barim ka North Tura u Noverfield N Marak u la khlad noh hapdeng ka jingshah sumar ha nongbah Guwahati, Assam hadien ba ban ka jingpang kaba la neh katto-katne por. U la pang bad shitom na ka jingpang ‘glioma’ bad ka jingpang tor.
Katkum ka khubor na ki bahaïing jong u, u la leit shah sumar sha Guwahati ha ka 30 tarik u Nailar, 2024 hadien ba u la ïoh ïa ka jingpang ‘brain aneurysm’ bad ha kaba u la hap ban shah puid hapoh ka Apollo International Hospital. Kane ka jingshah puid ka la long kaba jop bad ha kaba u la wan phai sha la ïing ha Tura.
Hynrei kyndit-kynsan u la kem pang biang bad ban shah sumar ha Holy Cross Hospital ha ka 24 tarik mynshem bnai ha Tura hadien ba ka ‘oxygen levels’ ka la hiar. Hadien kane la pynkynriah noh sha Pratiksha Hospital ha Guwahati. U la hap ban thiah naduh ka 26 tarik mynshem bnai, bad ha kaba ki doktor ki la pyntip sha ki bahaïing ba u la don ka jingkem pang na ki tor bad ka jingpang pneumonia bad namar ka glioma, ka jinglong jingman ka met ka la hiar bha.
U la khlad noh ha ka por 5:20 janmiet jong ka Sngi Thohdieng bad ïa ka met jong u, la wan pynkit noh sha Tura ha kane hi kajuh ka sngi. Ki bahaïing ki la pyntip ba ka jingleit ontep ïa ka metïap kan long ha ka Sngi U Blei.
U Noverfield u la jop ïa ka ilekshon MLA kaba nyngkong eh na ka tiket jong ka Congress ha u snem 2013 bad ha u snem 2018 u la shah rem noh ha u kyrtong ka NPP u Thomas Sangma.
