Tura, Risaw 04
Ka GSU, Khasi Hills Zone ka la dawa tohkit halor ki khubor pynkulmar jingmut bapher-bapher kiba la mih na Ranikor CHC hadien ba la pynkit ïa ki lanot jingjia aksiden sha katei ka jaka sumar ha ka 1 tarik u Risaw.
Ha ka jingujor sha ka Director ka tnad ka Koit ka Khiah (DHS) ha Shillong, ka seng ka la kynnoh ba ka don ka jingbym shimkhia na ka liang ki doktor bad ki nongtrei ka koit ka khiah kumba la pyntip da ki nongpang.
“Kiba la ngat ha katei ka jingjia aksiden ki la mad ïa ka jingpynslem ka bym lah mutdur ban ïoh ïa ka jingsumar bad ki hap ban ap da ki kynta. Kum kine ki jingleh kim long kiba lah ban pdiang namar ka buh jingma ïa ka koit ka khiah bad ka jingshngaiñ jong kito kiba la ngat ha ka aksiden,” la kynnoh ka seng.
Katkum ka jingong jong ka seng, la ïohi ïa uwei u nongsar uba dang pynkhuid ïa ki jingmong jong u lanot uba ngat ha katei ka aksiden – kaba long ka jingpynkheiñ ïa ki kyndon ka koit ka khiah.
Ka seng ka la kynnoh ruh ba la khanglad ban ai ïa ki kali kit nongpang sha ki lanot bad ki hap ap ïa kawei ka ban wan poi na Khonjoy kaba jngai 40 kilomitar.
Ka seng ka la kynnoh shuh-shuh ba kawei ka longkmie armet ka la shah iehnoh kaba la pynlong ïa ka ban tyrkhong um katba ka dang ap ïa ka jingpeit bniah ‘Sonography’.
Da kaba pynpaw ba kine ki jingjia baroh ki long kum ka jingbym shimkhia jong ki nongtrei bad ki doktor, ka seng ka kyntu ïa ka bor ba dei peit ban khmih bniah ïa kane ka kam bad pynshitom ïa kito kiba donkti.
