Kohima, Risaw:
Ha kaba ïadei bad ki jingkylla kiba wan hap hapoh ki kam saiñ pyrthei, ar ngut ki heh nongïalam barim jong ka seng Congress na Nagaland ki la leit ban pynïasoh bad ka seng Bharatiya Janata Party (BJP).
U Working President barim bad u Treasurer jong ka Nagaland Pradesh Congress Committee (NPCC), u Bobby Panicker ryngkat bad u Deputy Speaker barim ka ïingdorbar thawaiï ka jylla u T Yangseo Sangtam ki la leit ïakynduh ïa u National President ka seng BJP u JP Nadda ha New Delhi ha ka lah sngi U Blei.
Ha kaba ïadei bad kine ki sienjam, la ïohi ba ka dei ka jingkyrshan kaba khraw ïa ka seng BJP ha ka thaiñ Shatei- lam- Mihngi, kaba nang pynïar shuh shuh ïa ka jingsynshar jong ka seng ha kane ka thaiñ.
U Anil Antony, uba long u nongïalam bad u nongaiktien jong ka seng BJP, u la pynpaw ïa ka jingkordor jong katei ka jingïalang.
“Arngut ki heh nongïalam jong ka kam saiñ pyrthei kiba la kham rangbah bha na Nagaland kiba kynthup ïa u Bobby Panicker, uba la shakri hashwa ïa ka kam kum u Working President barim jong ka NPCC bad kum u Treasurer ba du T Yangseo Sangtam, uba dei u Deputy Speaker barim jong ka ïingdorbar thawaiñ jong ka Nagaland-ki la leit ban pynïasoh bad ka seng jong ngi. Dang shen ki la ïakynduh ïa u JP Nadda,” la ong u Antony.
U la ban jur shuh shuh da kaba ong ba ka rai jong kine ki nongïalam ba shlur ban rung sha ka seng BJP ka dei namar ka jingsngewtynnad jong ki ïa ka jinglong nongïalam jong u Myntri Rangbahduh ka ri u Narendra Modi.
“Da ka jingpynshlur na ka jingtrei jong u Myntri Rangbahduh, ki briew ha ka thaiñ Shatei-lam-Mihngi ki la nang bun ha kaba ki la pdiang ïa ka seng BJP,” la bynrap shuh shuh u Antony.
