Nongpoh, Risaw 04
Ka jingthmu ban shna ïa ka surok saw lynti na Umïam sha Malidor wat lada kam pat sdang, hynrei ki la mih shibun ki jingkynthoh na ki ‘riew paidbah khamtam ha ka shnong Umroi Madan kaba kane ka surok kan ïaid lyngba u laiñ bathymmai (new alignment) kaba kum ki paidbah nongshong shnong ki la pynpaw ïa ka jingsngewkhia kaba jur ba kan don ka jingktah ïa ki tyllong umbam-umdih jong ka shnong.
Ha kine ki khyndiat por kiba la dep, ngi la ïohi ruh ïa ki paidbah jong ka shnong Umroi Madan kiba la mih ban pyrshah bad ki don ruh na ka liang jong ki nongïalam shnong kiba ai jingkyrshan ïa katei ka jingthmu ban pynïaid thymmai ïa katei ka surok lyngba ki ranab lum kiba don mar syndah bad ka shnong. Kane ka kynrum-kynram ka la pynlong ruh wat ïa u MP ka Shillong, u Dr Ricky A.J Syngkon ban leit jurip hi dalade sha katei ka jaka kaba don ka tyllong um jong ka shnong Umroi Madan ha kine ki khyndiat taïew ba la dep.
Ha ka jingleit ringdur jong u nongthoh khubor la ïohi ba ka tyllong um jong ka shnong Umroi kaba don ha trai jong u lum uba katei ka surok saw lynti la thmu ban pynïaid lyngba, kan don marjan bad mar ryngkat ka jingmadan (level) bad ki ïing kiba la shna thymmai ha katei ka ranab lum na ka bynta ban ïoh bai lutksan kaba pynpaw shai ba ka katei ka tyllong um ha katei ka jaka ka la shah ktah lut lada ïa katei ka surok la pynïaid lyngba katei ka lynti kaba thymmai naba ka tyllong um ka dei kaba don ha ki bynta ba kham sharum jong u khap lum ter ter shaduh shajan jong ka pynthor kba.
Kumba la ïohi ha kiwei pat ki jaka, ka jingtih khyndew ban shna ïa katei ka surok kaba thymmai kan sa wanrah ruh ym tang ka jingduh jong katei ka tyllong um, hynrei kan wanrah ruh ïa ka jingduhnong ïa ki trai pynthor kba bad ki trai ïing kiba don ha trai jong utei u lum na ka tuid bad twa jong ka khyndew.
Katkum ka jingïoh ban ïakren bad katto-katne ki ‘riew rangbah katei ka thaiñ ki bym kwah ban pynpaw kyrteng satia ki la kynnoh ba lehse ka don ka jyrsieh kaba shyrkhei halor kane ka jingthmu ban pynïaid ïa ka laiñ ba thymmai jong kane ka surok naduh na Umeit ter ter shaduh sha Syllei-U-Lar naba ka hap ban ïaid lyngba ki jaka puta jong katto-katne ki heh ophisar bad ki heh spah kiba don ka jingïadei ba ïajan bad ka sorkar.
Kitei ki ‘riew rangbah ki la ïathuh ruh ba bun na ki heh spah ki la dep ban thied lypa ïa ka jaka ha katei ka laiñ kaba la thmu ban shna thymmai ïa katei ka surok, da kaba buh jingkylli ba lehse ka jingbym pynïaid ïa ka surok na ka laiñ kaba rim ka dei ka jingïoh rung khlieh ne ka jingdon bynta jong kita ki ‘High Level’ bad ki heh spah ki bym don ka mynsiem pyrkhat ïa ka jingduhnong jong ki paidbah nongshong shnong bad ka jinglut-phut kaba ka sorkar ka hap ban bei tyngka lada shna lyngba katei ka laiñ kaba thymmai.
Kaei kaba kham pynlyngngoh shuh shuh ka dei halor ka jingmih thymmai jong ki ïing dap kiba da ki phew spah tylli ha shi lynter katei ka laiñ kaba la thmu ban shna ïa ka surok ba thymmai naduh na Umeit ter ter shaduh sha Syllei-U-Lar tang ban ïoh bai lutksan. Katkum ka jingïoh ringdur la ïohi ruh ba ki don katto-katne ki trai jaka kiba la shu sieh ïa ka dieng kait khlem ka shriew lane tynrai bad kiba la ïapstai noh lehse tang ban ïoh bai lutksan na ki bor sorkar.
Kynnoh ba leh shilliang khmat u Additional Deputy Commissioner ka Ri Bhoi ïa kiba pyrshahHa kawei pat ka bynta, ki nongshong shnong jong ka Umroi Madan kiba pyrshah ïa katei ka jingthmu ban shna surok kiba la shah khot ha ka jingïalang hynnin ka sngi ha ka ophis jong u Deputy Commissioner ka Ri Bhoi kaba la pynïaid da u Additional Deputy Commissioner, ki la pynpaw ba kim don jinghun satia naba ym shym la pynbeit ïa ki jingeh kiba kum ki paidbah ki la pynpaw.
Ha ka shithi kaba la phah sha u Deputy Commissioner ka Ri Bhoi mynta ka sngi, kitei ki ‘riew rangbah kiba pyrshah, ki la ong ba katei ka jingïalang kaba la pynïaid da u Additional Deputy Commissioner hynnin ka sngi, kam shym la lah satia ban weng ïa ki jingeh kiba ki la pynpaw khamtam halor ka jingduh jong ka tyllong um.
Ki la pynpaw ruh ïa ka jingsngewkhia ba ha katei ka jingïalang hynnin ka sngi, la wan ban ïadon bynta pynban da ki trai jaka kiba dei na kiwei ki shnong bad ki bym don bynta eiei bad ka shnong Umroi Madan, da kaba kynnoh ba ki dei ki briew na ki thaiñ sor kiba thied jaka dang shen tang ban ïoh bai lutksan kaba heh na ka sorkar bad ki bym don satia ka jingtip bad ki jingeh jong ki paidbah nongshong shnong ka Umroi Madan.
Halor kane ka bynta, na ka liang kitei ki ‘riew rangbah ki la buh ka jingkyrpad ïa u Deputy Commissioner ka Ri Bhoi District ba un pyrkhat sani bad wad da kiwei ki lad ki lynti ban shna ïa katei ka surok na kawei pat ka jaka ka ban ym ktah ïa ka tyllong um jong ka shnong bad ruh ïa ka mariang sawdong sawkun.
