Shillong, Risaw 04
Ka Nagaland bad ka Sikkim kin ïakhun pyrshah ha ka phainal jong ka 1st Senior Women’s Interstate Friendship T20 Tournament ba la pynlong da ka North East Cricket Development Council (NECDC) bad ka Meghalaya Cricket Association mynta ka sngi Saitjaiñ.
Ïa kane ka jingïakhun phainal la buh ban sdang ha ka por 10 baje mynstep, lada ka suiñbneng ka ailad bad yn pyni paidbah lyngba ka cricheroes.in.
Ïa ar tylli ki jingïalehkai semi-final la hap ban pynkynriah noh sha ka Sngi Thohdieng ha madan kriket Pahamsning kaba don hajan Nongpoh, hynrei la shah pynthut ha u slap.
Kumta ïa kane ka jingïakhun semi-final ba nyngkong hapdeng ka Meghalaya bad Nagaland la rai da ka ‘Bowl Out’, ha kaba ki nongtied bol na kawei pa kawei ka kynhun ki la shah pynkhyllem lut baroh. Ka la long ka jingïakhun kaba jynjar ha ki katto katne minit na ka bynta kawei pa kawei ka liang bad ka Nagaland ka la lah ban tam da 2-1 na ka bynta ban khur ïa ka jingjop.
Ha kawei pat ka jingïakhun semi final hapdeng ka Sikkim bad ka Manipur kaba la rai lyngba ka ‘Super Over’. Ka jingïalehkai bha ka Pranita Chettri bad kumjuh na ka Sikkim ka la khanglad ïa ka Manipur ban kynjoh sha ka thong.
Namar kata, kitei ar tylli ki kynhun kiba la rung sha ka phainal ki la dep ban ïakynduh shisien ha kane ka lympung namar baroh ar tylli ki kynhun ki la mih na ka Group-B. Ka Sikkim ka la lah ban pynliem ïa ka Nagaland da 4 wiket ha ka sngi kaba ar bad mynta ka Nagaland kan ïoh ïa ka lad ban pynphai kylla.
