Shillong, Risaw 04
Ka tnat Home Guards and Civil Defence ka Sorkar Jylla ka la pynbna ban pynsangeh shwa ïa ka Physical Efficiency Test (PET) kaba kynthup ïa ka jingmareh namar ka jingbym biang ka madan kaba la ktieh shaba palat hadien ka jingjur slap ha kine ki sngi.
Haba pynbna ïa kane mynta ka sngi ka 4 tarik Risaw, 2024, u Myntri uba peit ïa ka tnat Home Guards and Civil Defence, Bah Comingone Ymbon, u la ong ba ka jingshim rai ban pynsangeh shwa ïa ka jingmareh ka dei hadien ba ma u dalade bad ki ophisar u la leit peit ïa ka jinglong-jingman ka madan ha Mawdiangdiang ha ka por mynstep jong ka Sngi Thohdieng ha kaba la lap ba ka madan ka la ktieh shaba palat namar ka jinghap slap lynter ha kine ki sngi.
Kumta u la ong ba hadien ba la ïohi ïa kane ka jinglong-jingman ka madan, la shim lang ïa ka sur jong ki samla kiba la poi sha madan ban mareh ha kaba ma ki ruh ki la mynjur ban buhteng shwa ïa ka jingmareh tad haduh ban da sangeh ka jinghap slap. Ynda ki samla kiba dei ban mareh ki la sngew ïahap ba dei ban pynsangeh shwa ïa ka jingmareh, ki la ïasoi lang kum ka jingmynjur.
U Bah Ymbon u la ong ba ïa ka tarik ban pynlong biang ïa ka PET ne jingmareh yn sa pynbna ynda la kham biang ka jinglong-jingman ka suiñbneng.
U Bah Ymbon u la ïathuh ruh na ka bynta kito kiba la dep mareh ha ka 2 tarik bad 3 tarik Risaw, 2024, yn dang ailad biang ba kin mareh thymmai lada don kiba kwah ban leh kumta namar ha ka 2 tarik bad 3 tarik Risaw ruh ka jinglong-jingman ka suiñbneng kam biang satia.
Na ka bynta kito ki bym kwah shuh ban mareh biang, yn pynshong nongrim beit ïa ka jinglah jong ki ban mareh ha ka 2 tarik bad 3 tarik Risaw, 2024.
Kum ban pynkynmaw, ka jingpynmareh na ka bynta ban pynrung kam pulit hapoh ka tnat Home Guards and Civil Defence ka la sdang naduh ka 30 tarik Nailur, 2024 bad ka la ïaid beit haduh ka 1 tarik Risaw khlem ka jingpynthut ka suiñbneng.
Baroh kiba la thep kyrteng ban ïoh rung kam pulit hapoh ka tnat Home Guards and Civil Defence ki kyrdan Sub Inspector, Guardsman, Driver bad Non Combatant Employee ki long 22,474 ngut.
Kiba la dep ban mareh ha Tura ki long 11,786 ngut. Lada kheiñlang ha Shillong bad Tura kiba la dep ban mareh ki long kumba 15,000 ngut.
Ha kawei pat ka liang, ki samla kiba thep kam hapoh ka tnat Home Guards and Civil ki la kmen bad mynjur lang bad u Myntri uba dei khmih ïa kane ka tnat, u Bah Comingone Ymbon halor ka rai ban pynsangeh shwa ïa ka jingmareh hadien ba ka madan kam long shuh kaba biang ban pyndonkam namar ka jinghap slap lynter.
Ïa kane ka jingmynjur lang ki samla la sakhi ha ka por ba u Bah Comingone Ymbon u la leit ban khmih ïa ka madan ha ka por 6 baje mynstep kaba ki samla ki dei ban mareh hapdeng ka ktieh namar ka jinghap slap lynter ha kine ki sngi.
U Bah Comingone Ymbon u la leit sha Mawdiangdiang ban khmih ïa ka madan kaba pynlong ïa ka jingmareh bad peit thuh ïa ka jinglong-jingman ka suiñbneng. Ynda u la dep ban jurip ha ryngkat ki ophisar, bad ki heh pulit Home Guards, la pynsngew sha ki samla kiba wan ban ïashimbynta ha ka jingmareh ha kaba ki la pynpaw ka jingmynjur lang ban pynsangeh shwa tad haduh ba ka tnat Home Guards and Civil Defence kan pynbna thymmai ïa ki sngi ban mareh na ka bynta kito ki bym pat pyndep ïa ka Physical Efficiency Test.
