Shillong, Risaw 04
Ka Laban Sport Club kaba dei kawei na ki klob kaba la rim ha kane ka Jylla kaba la seng naduh u snem 1906, ka la pynlong ïa ka lympung ïalehkai table tennis ba la tip kum ka 3rd Meghalaya Open Table Tennis Cash Prize Tournament 2024.
Ïa kane ka lympung la plie da u President ka Riat Laban Dorbar Pyllun u Bah I. Sunn ha ka jingïadon lang ki dkhot nongkitkam jong katei ka klob, ryngkat ki nongshim bynta bad kiwei kiwei.
Haba batai shaphang kane ka jingïakob, u nongïalam ka Laban SC u Bah Samy Myrthong u la pyntip ba ha kane ka kynti ka long kaba donbok ba ha kane ka jingïakob, la wan ïashim bynta lang ruh wat da ki nongïalehkai kiba dei na shabar jong ka jylla kum na Assam West Bengal. Lyngba ka jingwan ïashim bynta lang kine nongïalehkai kiba nabar kan plie lad ïa ki khynnah ka jylla ban ïoh pynpaw lem ïa la ka jingtbit ban ïalehkai bad ba kin lah ruh ban ïa kynjoh lem ïa ka kyrdan kumba la ïalehkai da ki khynnah jong kiwei pat ki jylla.
Ha kane ka jingïakob la phiah ha ki kyrdan ïalehkai bapher-bapher.
Haba ïadei bad ki khusnam u Bah Sammy u pynpaw ba ym pat lah ban ai da kaba heh namar ba dang shu sdang kaba ïa mynta la pyrshang ban ai katba don ei la i jong i bor ba kynthup ïa ki song pisa bad ki trophy. Nalor kata, u la pynpaw ruh ba ka klob ka kwah ba kan don ïa kane ka lympung man la u snem bad pyrshang ruh ban ïatreilang bad ka sorkar kaba ïa mynta ka lad hi kam pat plie ïa kaba u kyrmen ba ha ki sngi ki snem ki ban wan lehse yn sa lah ban ïatreilang bad ka sorkar.
