Singapore, Risaw:
U S Iswaran, u Myntri barim jong ka tnad ka kit ka bah jong ka Singapore bad uba long ruh u nong India, ha ka Sngi Palei u la shah rai set patok haduh shi snem hadien ba ka ïingbishar ka la pynngat ia u hapoh phra tylli ki jingkynnoh lane ki kyndon, kiba iadei bad ka kam bamsap bad ki jingleh kam be-aiñ jong u mynba u dang dei u Myntri jong katei ka tnat ha Singapore ha ki snem ba la leit.
Kumta ruh la ong ba ka jingpynshitom na ka bynta jong u kan long palat ia ka hynriew haduh hynriew bnai katkum ka jingdawa jong ka liang ki nongmudui mukotduma pyrshah ia u. Namarkata, u nongbishar jong ka ïingbishar ka Singapore, u la ong ba katba ki kam pynkheiñ aiñ jong u ki nang jur katta ka aiñ ruh kan nang pynngat ia ki kyndon kiba kham heh ban pyniahap bad kitei ki jingleh kam sniew bad jingpynkheiñ aiñ jong u mynba u dang don ha ka kam.
Utei u Myntri barim, u dei u briew uba nyngkong eh ban shah pynngat ha ka kyndon aiñ 165 jong ka Singapore hadien ba la ioh ia ka jinglaitluid.
U nongbishar Vincent Hoong u phai sha ki mat pynjem jingeh kiba ka liang pyrshah ka la pynpaw, kynthup ïa ka jingshakri paidbah jong u Iswaran ïa ka Singapore, ka jingpynjah burom mon sngewbha jong u ïa ki jingmyntoi bad ka jingphla kloi jong u ïa ka pop.
Da kaba shim ba kiwei pat ki 30 tylli ki jingkynnoh kiba la shim khia ki don ka jingiasyriem bad ki jingkynnoh ba la pynlong ha kaba u la ioh jingai sngewbha, u nongbishar u la ong ba kine ki jingkynnoh ki pynpaw ia ka jingheh bad ka jingpynkylla biang ia ka jingleh be-ijot ha ka por kaba jrong. Kane ka dei ka jingpynkiew ia ka jinglong pop, ong u nongbishar Hoong.
Ka jingshakri paidbah bad ki jingnoh synniang jong u sha Singapore ki long kaba bun eh ka daw kaba pdeng, bynrap biang u nongbishar.
U Justice Hoong u la ong ba u shem jingeh ban ngeit ba u Iswaran u la sngewsih, namar ba une u ba hadien u la pynmih ia ki jingkren paidbah da kaba kyntait ia katei ka jingkynnoh kaba bakla.
