Nongpoh, Risaw 04
Ki Nongïalam jong ka shnong 11 Mer Mawsmai ha ka Sngi Thohdieng ki la lum da ka jingïalang kaba kyrkieh ha Jorabat hadien ba shah shoh ki khynnah samla kiba dei na ka shnong 11 bad 12 Mer Mawsmai ha ki briew na ka jylla Assam kiba la kynnoh ba ki dei ki ‘syndicate’ lane ki nongpynïaid jong kawei ka khyrdop khrong pisa ha ki bynta jong ka jylla Meghalaya ha Jorabat.
Katkum ka khubor ba la ïoh lum la ïathuh ba kitei ki ‘syndicate’ ki la shoh ïa kitei ki samla ka shnong 11 bad 12 Mer Mawsmai ha ka por 10 baje eiei jong ka miet 2 tarik mynta u bnai Risaw, da kaba bat ïa ka kali kaba ki shong bad sei shabar ban shoh ban dat ïa ki da ki bilor kyiad. La ïathuh ba kitei ki ‘syndicate’ ki la pyrshang ruh wat ban dung ïa kitei ki samla kat haduh ba ki la mynsaw na ki bynta jong ka kpoh bad ka durkhmat.
Hadien jong katei ka jingïalang ba la wan ban ïadon lang naduh u Rangbah Shnong ka Mawsmai, u Bah Petrus Shakwa, ki Nongïalam ka Federation of Khasi Jaiñtia & Garo People (FKJGP) Byrnihat Circle lem bad ki paidbah nongshong shnong, ki la shim syndon ïa ka rai ban phah da ka jingthoh sha u Deputy Commissioner (DC) ka Ri Bhoi ban phah weng noh shisyndon ïa katei ka khyrdop kaba la pynïaid da kitei ki ‘syndicate’ na ka jylla Assam kum shi bynta ban wanrah biang ïa ka jingshngaiñ ïa ki paidbah nongshong shnong kiba sah ha kitei ki thaiñ.
Na ka liang jong kawei ka longkmie kaba la wan ban ïadon ryngkat ha kane ka sngi, da ka mynsiem jong ka jingtieng jingsmiej ka la mih shakhmat ban pynpaw paidbah ba ka la lap la bunsien ïa kum kine ki jingjia ha katei ka jaka khrong pisa jong kitei ki ‘syndicate’ na ka jylla Assam kiba ju shong man la ka miet ha katei ka jaka ha Jorabat.
Katei ka longkmie ka la kynnoh ruh ba kitei ki ‘syndicate’ na ka jylla Assam khamtam hadien ka jingshoh khawiang, ki ju shoh bad pyndik ïa ki briew shnong kiba sah ha kitei ki thaiñ khappud. Kumba katei ka jaka ka dei ruh kaba ju ap pahara da ki pulit ka Jorabat na ka jylla Assam, katei ka longkmie ka la kyntu ïa kitei ki pulit bad kitei ki ‘syndicate’ kiba lehse ki lah ban ïadon kti lang, ba lada ki kwah ban kamai, ki dei ban ïaid da ka kamai kaba hok, ym ban shu shoh shu dat ne pyndik ïa ki khynnah shnong kat haduh ba kam don shuh ka jingshngaiñ ïa ki nongleit nongwan.
