Shillong Risaw 04
Ka tnat ka koit ka khiah kan sa pyndonkam bha ïa ki jingtei jingshna kiba la tei ha ka por ka khlam COVID-19 khnang ba kine ki jingtei kin long ka jingmyntoi ha ka rukom treikam bad jingai jingshakri ki jaka sumar.
Ka Myntri ka tnat ka koit ka khiah, ka Kong Ampareen Lyngdoh ka la ong ba ki don katto-katne ki jingtei kiba la tei ha ka por ba ïakhun ïa ka jingpang COVID-19 ha kaba ki don kiba la pyndonkam kum ki jaka pynlang tiar bad buh ïa ki jingdonkam jong ka tnat ka koit ka khiah.
Ka la ong ba ha Umsawli, ka Corona Care Centre kaba la pynbit pynbiang ha kato ka por, yn sa pyndonkam noh bam buh ïa ka Skill Laboratory.
“Ngi pyndonkam ïa kine ki jingtei jingshna bad yn sa khmih bniah ban pyndonkam kham bha ïa kine ki jingtei kynthup ïa ki jingtei kiba pyndonkam ïa ki tiar kiba sted ban shna kiba la tip kum ki Prefabricated,” la ong ka Kong Ampareen.
Ha ka por COVID-19, ka Sorkar Jylla ka la shna katto-katne ki jingtei ban pyndonkam kum ki Corona Care Centre bad ki Quarantine Centre ha ki bynta bapher bapher ka Jylla hynrei don ruh ki jaka kiba la shu pyndonkam tang shipor ha ki skul bad ïing shnong ban pynsah ïa kiba don jingshitom.
Ha kawei pat ka liang, ka Kong Ampareen ka la ïathuh ba kum ka Myntri ka la pynlong ïa ka jingïalang ban khmih bniah ïa ki Drug De-addiction ha ki Civil Hospital kiba don mynta ha Shillong bad Tura Civil Hospital.
Ka la ong ba kine ki Drugs De-addiction kiba don ha Civil Hospital ki donkam ïa ki nongpeit kiba la pyndep ïa ka jingpule bad dang shen ki don 10 ngut ki doktor kiba la leit pule bad ki la pyndep ïa ka jingpule.
Ha kawei ka liang na ka bynta kiba kyrni drok, ka la ong ki donkam ban shah pynkhuid shwa ïalade bad kin sa leit sha ki jaka sumar ban pynkylla pat ïa ki.
Kumta ka la ong ba ka Sorkar ka thmu ban buh ïa kine ki Drug De-addiction ha kiwei ruh ki Civil Hospital namar kumba ka long mynta ka don ha Shillong bad Tura.
