Imphal, Risaw:
Ka Manipur Pradesh Congress Committee (MPCC) ka la pynrem jur ïa ka jingkynnoh ba dang shen halor ka jingong ba ka la don ka jinglute tiar siat na ka jaka treikam jong ki pulit ka Ukhrul ha ka por ba don ka jingïakynad hapdeng ar tylli ki shnong halor ka jingïakajia jaka.
Kane ka kynhun ka la phah ban tohkit bniah halor kane ka jingjia. Haba ai jingkren sha ki lad pathai khubor ha ka jingïalang bad ki nongthoh khubor, u President ka MPCC u Keisham Meghachandra Singh u la pynpaw ba ka 2 tarik, Risaw ba la rakhe ïa ka International Day of Non-Violence, la sakhi ïa ka jingjia kaba sngewsih ha Ukhrul distrik, kaba ha Manipur.
Ka jingïakynad kaba jur ka la mih halor ka jaka puta hapdeng ar tylli ki shnong ha kaba kane ka jingjia ka la shim ïa ka jingim jong saw ngut ki briew bad pynmynsaw ïa bun ngut kiwei pat. U Singh u la kynthoh ïa ka sorkar jylla, da kaba kdew ba ki jingjia jong ka jinglute tiar ki la kylla long ka rukom ha ka por ba mih ki jingjia ba shyrkhei.
U la kynnoh ba ki tiar siat, kiba ju lute na ki jaka treikam jong ki pulit, ki i kumba la pynbiang ym ban tuh, da kaba kdew ïa ka jingshah thombor ha Ukhrul kum ka sakhi ïa ka jingbym lah leh ei ei jong ka tnad kam pohïing.
U la buh jingkylli halor kiba bun ki tiar siat kiba dang sah ha ki jaka treikam jong ki pulit hapoh ka jylla, haba kheiñ ïa ka jingjia kaba ju jia man ka por jong kum kine ki jingshah lute.
U Singh u la pynpaw ruh ba ki bor pynïaid distrik ki la tip bha ïa ka jinglah ban mih ka jingïakynad hynrei kim shym la lah ban khanglad, da kaba kyntu ïa ka sorkar jylla ba kan shim ïa ka jingkitkhlieh. U Singh u la buh ka jingkyrpad ïa ka kynhun jaitbynriew Tangkhul hapoh ka distrik na ka bynta ban ïaleh katba lah ban pynphai biang ïa ka jingsuk bad ka jingshngaiñ. Kum ban shu pynkyn -maw, la ong ba ha ka 2 tarik, ki paidbah ki la leit tur sha ka jaka treikam jong ki pulit ha Ukhrul bad ki la lute ïa ki tiar siat ha ka por ba don ka jing-ïakynad hapdeng ki nong -shong shnong ka Hungpung bad Hunphun.
