Shillong, Risaw 06
Ka Sikkim bad ka Nagaland ki la ïasoh lang ban long nongjop (joint winners) ha ka lympung ïalehkai 1st Senior Women’s Interstate Friendship T20 Tournament kaba la long ha ka Sngi Saitjaiñ ha Nongkhrah, Ri-Bhoi, hadien ba kim shym la ïoh ban ïalehkai na ka daw ba shah pynthut ha u slap bad jhieh ka madan ïalehkai.
Ïa kane ka lympung la sdang naduh 30 tarik u Nailur ba la pynïaid da ka North East Cricket Development Council (NECDC) bad ka Meghalaya Cricket Association (MCA). Ki la don hynriew tylli ki kynhun kiba la wan ïashim bynta na hynriew tylli ki jylla kiba kynthup na Arunachal Pradesh, Manipur, Meghalaya, Mizoram, Nagaland bad Sikkim.
Ka jingthmu jong ka NECDC ban pynlong ïa kane ka lympung ka long ban pynkhreh ïa ki kynhun ïalehkai jong ki kynthei (senior) na ka bynta ki lympung ïalehkai jong ka BCCI jong ka aïom 2024-25. Lai sngi kine ki jingïalehkai group ki la long kiba biang bha ha kaba la lah ban pyndep pura bad ka madan ka la long kaba biang bha, hynrei na ka daw ka jingshah pynthut noh ha u slap ym shym la lah ban pynlong ïa ki jingïakhun na ka bynta ban ïaknieh ïa ka nam lahduh.
Ha kane ka jingsam ïa ki khusnam, ka kapten jong ka Meghalaya ka Debasmita Dutta (kaba la poi sha ka semi final) ka la ïohpdiang ïa ka nam Player of the Tournament namar ka jinglah jong ka ban ïalehkai ha baroh ki liang (tied & kawang bol) ban kamai 46 run bad shim 5 wiket.
Ïa ka nam Best Batter la ïohpdiang da ka Samayita Roy Prodhan na ka Sikkim, kaba la kamai 63 run ha ki san inning, bad ka Best Bowler ka leit sha ka Monica Devi Ningthoujam na ka Manipur kaba la shim 6 wiket, kynthup ïa kawei ka 5 wiket. Ka paralok jong ka, ka Kalpana Devi, ka la shah jied ban ïohpdiang ïa ka nam Wicketkeeper, namar ba ka la ban pyndep ïa ki saw tylli ki wiket kiba ka la lah ban pynhap kiba kynthup ïa lai tylli, kawei ka jingïoh ban kem ïa ka bol.
Haba ai jingkren ha katei ka sngi pynkut, u kongsan u Director ka tnad ïalehkai jong ka Sorkar Jylla u Dikki D. Shira uba la don ka jingïadei kaba jam bha bad ka MCA, u la ong ha kine ki ar tylli ki kynhun, “Ka jingtrei shitom bad jingminot jong phi ka la sei soh. Nang ïai trei shitom shuh shuh, nang kilan met bha bad bteng ïa ka jingjop jong phi.” U la ai khublei ruh ïa ka NECDC kaba la pynlong ïa kane ka lympung ha kane ka jylla Meghalaya.
U Myntri ka tnad ïalehkai jong ka Sorkar Jylla u Bah Shakliar Warjri um shym la lah ban don lang ha kane ka prokram pynhap pyrda, hynrei u la phah ï aka khubor sha ki nongïalehkai da kaba ong, “Lyngba ka jingaiti lut bad ka jingtrei shitom nga thikna ba ngin sa ïohi ïa phi ba phin ïai bteng da kaba jop.”
U nongseng abd uba long u Convenor jong ka NECDC bad uba long u President ka MCA, u Nababrata Bhattacharjee u la ïaroh ïa ka jingpyrshang jong ka Ri-Bhoi District Cricket Asso-ciation (RBDCA), ba la ïalam da u President (bad u Vice-President ka MCA) u Bah Rayonald Khar-kamni, ha kaba la lah ban pyn-khreh ïa ka madan Nongkhrah tang ha ki khyndiat bnai.
U Bhattacharjee u la ai khublei ruh ïa ki nongshong shnong bad ki riew rangbah jong ka Nongkhrah kiba la leh ïa la ka jong ka bynta ban kyntiew ïa ka kriket ha Meghalaya bad ha ka thaiñ hi baroh kawei.
Kiwei pat kiba la ai jingkren ki kynthup ïa u Mamon Majumdar uba dei u dkhot jong ka BCCI Apex Council. U la pynkynmaw ïa kito kiba la don lang ba dei u Bhattacharjee uba la ïarap ban pynlong ïa ki hynriew tylli ki jylla ban long ki dkhot ba pura jong ka BCCI ha u snem 2018.
