Khliehriat, Risaw 06
Ka Tuberkmai shnong bad Wapung shnong ki la long kiwei pat ki kynhun kiba la lah ban pynthikna ban rung sha ka quarter final jong ka lympung ïalehkai Third Division Football Tournament ba la pynïaid da ka East Jaiñtia Hills District Football Association (EJHDFA).
Kane ka la wan hadien ba kine ar tylli kynhun ki la ïoh jingjop ha ar tylli ki jingïalehkai pre-quarter final kaba la long ha ka sngi Saitjaiñ ha madan Artificial Turf Deinshynrum, Khliehriat.
Ha ka jingïalehkai kaba nyngkong, ka Tuber Kmaishnong ka la pynliem noh ïa ka Nongthymme SC lyngba ka tie-breaker da 4-3 kol hadien ba kine kynhun ki la ïa thep mar shi kol haduh kaba kut ka jingïalehkai.
Wat la ka jingïakhun ka la long kaba itynnad bad kaba ïakhaid, hyneri hadien shiteng kynta ka Nongthymme kala ïoh pynkhih jar nyngkong eh lyngba u Ebormi Sympli ha ka minit 36. Ka Tuberkmai shnong ka la lah ban pynphai kylla ha ka kylla miet lyngba u Samewaki Ryngkhlem ha ka minit 74 na ka bynta ban ïakhaid mar shi kol.
Haba phai sha kawei pat ka jingïakhun kaba ar, ka Wapung shnong ka la pynliem noh ïa ka Evergreen SC Ladwah-wapung lyngba ka tie-breaker da 3-1 kol hadien ba la ïakhaid mar shi kol haduh kaba kut ka jingïalehkai.
Na ka Wapungshnong la thep da u Damang Ryngkhlem ha ka minit kaba 17, hynrei ka Evergreen SC Ladwah-wapung ka la pynïakhaid kylla lyngba u Satisfy Lamo ha ka minit kaba 47.
Kane jingïakhun ha ka lah sngi U Blei kan long hapdeng ka Suchen Mulieh YWSC pyrshah ïa ka Wapungskur SSWO ha ka por 10 baje mynstep, ka Moolang SC ïa ka Lumshnong YWSC ha ka por 12:30 mynsngi bad ka Musniang Rim SC ïa ka Lakadong Ummat SCSC ha ka por 3 baje janmiet.
