Shillong, Risaw 06
Ka Nongkseh Sports Social and Cultural Club (SS &CC) ka la pyllait ïa ki jersey ïalehkai (home and away) na ka bynta ka lympung ïalehkai First Division Football League 2024 ban pynïaid da ka Shillong Sports Association (SSA).
Ïa kane la pyllait ha ka Sngi Thohdieng ha ka jingïadon lang u Bah Myrank Thangkhiew kum u kongsan ha ryngkat ka jingïadon lang u Rangbah Shnong ka shnong Nongkseh, Raid Saw Kur lem bad kiwei kiwei kynthup lang ïa ki dkhot Executive Committee (EC) jong ka Dorbar Shnong Nongkseh, ki rangïalehkai bad ki nongpynïaid jong kane ka klob.
Ha katei kajuh hi ka sngi, ka klob ka la pyllait ruh ïa ka jingrwai ‘anthem’.
La seng ïa ka Nong-kseh SS&CC ha u snem 1969. Ka dei kawei na ki klob ïalehkai phutbol kaba la rim bha ha nongbah Shillong. Kane ka klob ka la ïashim bynta shitrhem ha ki lympung ïalehkai jong ka SSA bad ka la mad ïa ki jingeh ha ki snem ba la leit. Kane ka klob ka la kiew kyrdan shisien sha ka Super Division League (Shil-long Premier League) bad mad ruh ïa ka jingshah hiar kyrdan shaduh Third Division.
Hynrei kane ka klob ka don jingkyrmen ban nangkiew shaphrang hapoh ka jingïalam u President ba thymmai u Bah Daniel M. Thangkhiew bad u Gene-ral Secretary u Bah Mar-biangdor Thangkhiew. Tang hapoh ar snem, ka klob ka la mad ïa ka jingkiew kyrdan biang sha ka Second Division hadien ba ka la wan ha ka kyrdan ba hakhlieh ha ka Third Division bad mynta ka aïom kan ïashim bynta ha ka First Division.
Hashwa ban sdang kane ka lympung, ka Nongkseh ka la soi ïa kato katne ki rangïalehkai kiba thymmai bad tbit.
Shuh shuh kane ka klob ka la khot ruh sha ka jingpyrshang ïa ki rangïalehkai kaba la long ha ka 21 bad 22 tarik u Jymmang ha kaba ki la don haduh 567 ngut kiba la wan na kylleng ka Jylla.
Na ka bynta ka aïom ïalehkai, kane ka klob ka la thung ïa u rangïalehkai barim jong ka I-League u Chesterpaul Lyngdoh kum u kapten bad vice-cap -tain u Armanki Khar-kongor, uba ïalehkai kham hashwa na ka Nongthym -mai SC ha kaShillong Premier League.
Kumta ka Nongkseh kan pynkhreh ïa ka jingïakhun kaba nyng-kong pyrshah ïa ka Umphyrnai SC ha ka 9 tarik mynta u bnai ha ka por 12 baje mynsngi.
