Shillong, Risaw 07
Ka Akhil Bharatiya Vidyarthi Parishad (ABVP) Meghalaya ha ka Lah Sngi U Blei jong ka taïew ka 7 tarik u Risaw 2024, ka la pynbna paidbah ba kan sa pynlong da ka jingïalang paidbah naduh ka 25 tarik u Risaw haduh ka 27 tarik u Risaw, 2024 ha Aurobindo Hall, Shillong.
Haba kren sha ki lad pathai khubor ha Shillong Press Club, u Secretary ka ABVP Meghalaya, u Tengku M. Marak u la pyntip ba ka Meghalaya kan sa ïoh ban pynlong ïa kane ka jingïalang paidbah kaba nyngkong eh hapoh ka Jylla, ha kaba yn sa ïashimbynta da kumba 500 ngut ki nongïashimbynta na ki distrik bapher-bapher kiba don hapoh ka Jylla bad kumjuh ruh na kiwei pat ki Jylla. U la pyntip ruh ba ki dkhot ba hakhmat jong ka ABVP, ki khynnah skul bad ki samla pule na ki jaka pule bapher-bapher kin sa wan ban ïashim bynta ha kane ka prokram.
Ha katei ka sngi, yn sa ïoh ruh ban pynlong ïa ka jingïaid paidbah ka ban sa sdang na Laitumkhrah shaduh sha Aurobindo Hall ban pyni ïa ka jingriewspah ka riti-dustur u khun Khasi-Khara lyngba ki jingriam tynrai kiba ki samla kin sa pyni ha katei ka sngi.
U Marak u la pyntip ruh ba ha kane ka jingïalang yn sa pynlong ruh ïa ki jingïaphylliew jingmut ka ban sa ïashim bynta da baroh ki nongwan ïashim bynta halor ki phang kiba bun kiba ktah ïa ki khun samla kum ka ïoh kam-ïoh jam, ka roi ka par bad kiwei-kiwei.
