Shillong, Risaw 07
Ki kynhun ïalehkai jong ka West Jaiñtia District Sports Association (WJDSA), Shillong Sports Association (SSA), Nongstoiñ District Sports Association (NDSA) bad ka Ri-Bhoi District Sports Association (RBDSA) ki la ïoh rung sha ka semi final ha ka kyrdan ïalehkai U-14 & 16 jong ka Meghalaya Youth League 2024.
Hadien ba la dep ban ïakhun ïa ki zonal round kiba la long ha kylleng ka jylla, kane ka lympung ba la pynïaid da ka Meghalaya Football Association ha ryngkat ka jingkyrshan jong ka Sorkar Jylla, ka la wanrah ïa ki ar tylli ki kynhun kiba wan hakhmat duh na kawei- pa-kawei ka zone sha Shillong, ha kaba ïa ka jingïakhun quarter jong ka U-14 la pynlong ha madan MFA kaba ha Polo, katba ïa ka U-16 la pynlong ha Sports Authority of India centre ha NEHU.
Ïa ka quarter final kaba nyng-kong la pynlong ha ka Sngi Saitjaiñ, katba ka jingïakhun ba ar la pynlong hynne ka sngi.
Kawei-pa-kawei ka jingïakop ka la long kaba pher na kawei pat lyngba ka jingïohi ïa ki sap ïalehkai ba kyrpang na ki khynnah ka Jylla.
Ka jingïashut tie-breaker kaba nyngkong ka la long ha ka Sngi Saitjaiñ, ha kaba ka West Jaiñtia ka la pynliem ïa ka Pyndengumiong District Sports Association da 5-4 kol ha ka U-14. Kane ka wan jia hadien ba kine arliang mamla ki la ïakhaid mar 2-2 kol hadien ba la dep ka extra time. Kam shym la don jingeh ïa ka kynhun U-16 jong ka West Jaiñtia namar ka la jop sa ïa ka Pyndengumïong da 5-0 kol bad u Dangkermi-oo Ryngkhlem u la ïoh ïa ka hat-trick. Ka WJDSA ka la long ka nongjop ha ka Zone-B, katba ka Pyndengumïong ka la wan ba-ar ha ka Zone-D ha baroh ar tylli ki kyrdan ïalehkai.
Kumjuh ha ka U-14, ka Shillong SA kaba long ka nongjop ba-ar ha ka Zone-C, ka la jop haduh 15-0 kol pyrshah ïa ka Tura District Football Association (kaba la jop ha ka Zone-A). Ka SSA ka la kham shem jingeh ha ka kyrdan ïalehkai U-16 namar ka la shah rem noh ha ka Williamnagar (ka nongjop ha ka Zone-A) da 2-0.
Haba phai sha ka jingïakhun mynta ka sngi, ka Ri-Bhoi kaba la jop ha ka Zone-C, ka la pynliem ïa ka North Garo Hills District Sports Association (kaba wan ba-ar ha ka Zone-A) ha baroh ar tylli ki kyrdan ïalehkai U-14 bad U-16. Ha ka U-14, ka Ri-Bhoi ka la jop da 6-0 kol, hynrei ka U-16 ka la da 5-2 kol ïa ka North Garo Hills.
Hadien kine ki jingïakhun la bud sa ar tylli ki jingïakhun ba ïakhaid bha hapdeng ka Nongstoiñ (kaba la jop ha ka Zone-D) bad ka Amlarem Block Sports Association (kaba la wan ba-ar ha ka Zone-B).
Ha kane ka jingïakhun U-14 la jop da ka Nongstoiñ da 3-2 ha ka extra time hadien ba ki la ïakhaid mar 2-2 kol. Ïa kane ka kol kaba khatduh la thep da u Shosstar John Sangriang. Ha ka jingïalehkai U-16, ka Amlarem ka la shah rem ha ka Nongstoin da 3-1 kol.
Ki jingïakhun semifinal baroh kin long ha ka Sngi Balang. Ka jingïakhun jong ka U-14 ha Polo hapdeng ka Shillong SA pyrshah ïa ka West Jaiñtia kan long ha ka por 10:30 baje mynstep bad bud sa ka Ri-Bhoi pyrshah ïa ka Nongstoiñ ha ka por 1 baje nohphai sngi.
Ka semi final ha ka U-16 ka ban long ha SAI, ka Shillong SC kan ïakhun pyrshah ïa ka West Jaiñtia ha ka por 10 baje mynstep, katba ka Ri-Bhoi ïa ka Nongstoiñ ha ka por 12:30 baje mynstep.
Ïa ka jingïakhun final yn pynlong ha ka Sngi Thohdieng.
